深宵「潮」食!潮汕小食慰藉「餓底」心靈!

瀏覽人數:1664
發佈於 2016.08.14

話說知道「心夜來潮」旺角店搬咗竇之後,先醒起之前食過但唔記得寫Blog「些牙」,希望依家同大家分享唔會太遲。對於潮州菜,好多人都會覺得好「大陸」、好「娘」,又或者停留喺打冷、滷水鵝、凍蟹、蠔仔粥等嘅印象。而位於旺角西洋菜南街 (舊址塘尾道嘉禮大廈地下)嘅「心夜來潮」,雖然主打潮汕菜式,以宵夜檔形式主理小店,但賣嘅係非一般常見嘅潮州菜,而係極具家鄉風味嘅小菜,唔行大圍路線走偏鋒,似乎有啲踩鋼線,但香港Sell家鄉風味嘅小店太少,便輕易一枝獨秀。

原隻醬醃膏蟹($88起)爆晒膏,完全唔輸畀韓式醃蟹!

正當大家都盲目衝去食韓國醬油蟹嘅時候,有冇諗過潮州醃膏蟹($88起)都可以好好味?醃蟹係潮州傳統美食「醃鮮」嘅一種,由於潮州汕頭汕尾一帶近海,海鮮極多,所以佢哋會用海鮮嚟做醃物。小妹超級鍾意食韓國醃蟹,覺得極鮮極甜,但試過「潮」式醃蟹之後,發覺又係另一種風味。潮式醃蟹嘅材料豐富,蒜頭、辣椒、五香料、頭抽、魚露同玫瑰露都可以醃出蟹嘅鮮味,最重要嘅係,經調味醃出嚟嘅蟹唔會死鹹,而係鮮、甜集於一身,一件件已斬件處理好嘅醃蟹,黏住橙紅色嘅蟹膏,輕輕吸吮,蟹膏蟹肉豐滿香腴,半透明狀嘅蟹肉肉質爽口,質感比韓式醃蟹更富彈性。

醬醃生蝦($48)

醬醃獅蚶($36)

膏蟹潮汕砂鍋粥($150)

醬醃生蝦($48)同醬醃獅蚶($36)同樣鹹鮮度十足,潮州人鍾意用嚟送白飯或白粥,小妹就同朋友嗌一鍋膏蟹潮汕砂鍋粥($150)湊吓熱鬧,以鮮鬥鮮。砂鍋粥滾住上,粥底綿密,放入膏蟹一齊滾,蟹膏同蟹肉精華融入粥底,鮮甜無比,深宵嚟一煲蟹粥,夫復何求?

正宗汕頭手打牛肉丸($32)

香煎手打肉丸($30)

汕頭嘅手打牛丸($32)令我諗起星爺《食神》入面嘅瀨尿牛丸,雖然冇戲入面嘅爆水效果,但係食落爽口彈牙,牛味十足,如果話用嚟當乒乓波打一啲都唔誇張。如果唔鍾意以湯嘅形式上,香煎又係另一種滋味,香煎手打肉丸($30)面層經過輕煎,外脆內彈,嗰種喺口入面嘅張力,真係難以用筆墨形容!

招牌牛雜鍋($88)

招牌牛雜鍋($88)則比較適合冬天食,但勝在煲仔雖小,牛雜俱全,所有牛嘅部位都可以搵到,小妹我唔係「麻甩佬」,好難對佢一見鍾情,不過如果係過吓口癮都仲OK,牛雜呢啲嘢,都係留番畀男朋友處理好啲!

小妹去食嘅時候仲係舊址,當時食完埋單就見到高朋滿座,可見其受歡程度!

 

店名:心夜來潮

電話:3620 3980

地址:旺角西洋菜南街138號福苑2樓 (開餐舊址:旺角塘尾道18號嘉禮大廈地下A舖 )

營業時間:星期一至日: 18:00-06:00

*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多美食文章推薦