Day 9 今日係澳洲旅程嘅最後一日，我地照舊跟本地團去大洋路。除非你同行起碼有兩個人識揸車可以輪流揸，否則我建議去大洋路都係跟本地團比較好啲。因為來回車程起碼8個鐘，得一個人揸車真係會非常非常浪費精神！ 大洋路入口 話說大洋路係一戰 (定二戰，唔記得左)之後，澳洲士兵打完仗返黎。政府完全唔知點安置佢地好，又冇野比佢地做，於是就叫左佢地黎整路。一整，就整左幾年，終於都起好左呢條沿海公路。因為係依住山岸興建，成條路都好多彎，多彎到傻！ 嘩！好藍嘅海呀！尼斯天使灣都好藍，但我覺得兩種藍好唔同。大洋路呢種藍係深藍，有種冷靜同沉穩嘅感覺。尼斯個海雖然都係好藍，但比人感覺係年輕有活力，係兩個原全唔同嘅海。 尼斯，係咪同上面果張好唔同？ 坐左好耐車，中途又落下地，睇下景咁樣，終於都到左12門徒石。其實你問我，我覺得係幾舊大石，你話佢地一齊夾緊band都講得通，但啲人就叫佢地做12門徒石。之後就好多基督教/天主教徒慕名而來。 的確係好壯麗，亦係大自然鬼斧神工嘅傑作。點解浸蝕唔係成片一齊浸，而係好似依家咁樣搞到有零丁幾舊大石走左出黎呢？呢啲就係大自然嘅奧秘。 澳洲之旅至此完滿結束。雖然我個畢業旅行就咁被逼成為左家庭遊，但澳洲都不失為一個好地方，成個旅程都玩得愉快。我偷偷地為自己定個目標，下次再去澳洲一定要去凱恩斯同塔斯曼尼亞！
