Day 1 日落 Day 2 休息過一晚，大家都充滿力量，於是安排了一個親親大自然的活動─龍柏樹熊庇護所！目的：查看袋鼠個袋睇下係咪真係有仔、抱抱樹熊！ 除了昆士蘭省外，澳洲所有動物園都已經禁止抱樹熊。所以來到昆士蘭必定少不得抱抱小樹熊。 樹熊是一種非常嗜睡的生物，每日訓足20個鐘都係等閒事。樹熊的主要食糧是尤加利葉，但尤加利葉有毒，小樹熊消化系統發育未完成，所以唔食得，咁戒奶後食咩好？答案就係....便便呀！哈哈哈哈哈哈 這個動物園之所以咁吸引我，係因為有得零距離同袋鼠玩~！呢度嘅袋鼠係圈養，有一大片草地比佢地自己係入面玩，而呢片草地亦係開放比人嘅。你可以買包野食餵佢地食，亦可以就咁同佢地玩 (不過冇野食當然就唔SHOW你啦~)。 呢度啲袋鼠好乖好得意，平時得閒就攤係地下、R下痕；如果有人行埋黎餵佢地就會即刻彈起身！但佢地同時都好串，野食跌左落地，唔食；餵緊隔離果隻，唔爭；你隻手遞得太高，袋鼠會伸隻手出黎禁低你隻手！LOL 佢個袋入面有隻仔呀！！！！ 袋鼠：衰人我唔夠高呀！ 對於係城市長大嘅香港人，呢度新奇有趣嘅事特別多。剪羊毛！ 其實成件事係頗為粗暴。首先夾硬拖隻羊出黎，搵腳夾實佢，再用電剪幫佢剃毛。 剃完之後成隻光脫脫，羊羊嘅皮膚好多位都整損左，好慘....../. 係動物園返到市中心，仲未開始天黑，所以去左Kangaroo Point。呢度係布里斯本其中一個小區，旅遊書同官方旅遊網站都話呢度風景好靚，而且好近故事橋呢個新地標。 風景係幾好，不過唔係靚到話唔黎唔得果種。如果有時間就不妨黎睇下風景飲下咖啡，如果好趕就可以唔使特登去。 聽講話好近故事橋，不如行過去睇下啦！嘩！行到我丫！行左足足半個鐘先見到條橋，說好的好近呢？ 靚唔靚？ 咁囉，係河上面睇可能會靚啲嘅。同埋佢受歡迎嘅原因唔係因為靚，係因為可以係上面攀爬！所以唔靚都冇所謂嘅。
