今年五月尾六月初，本應是畢業旅行的好季節，但在母親大人極力反對我再去歐洲並自把自為買了四張澳洲機票之下，我被逼放棄了自己的畢業旅行，無奈接受這個澳洲之旅 (並且還得安排一切酒店行程及自費！)。 這次坐的是星加坡航空經星加坡前往布里斯本的航班；回程則由墨爾本起程，中停星加坡，再回香港。13天的行程包括9日8夜澳洲及4日3夜星加坡。在星加坡4天除了不停吃之外也沒做過什麼，在此略過不敍，就只談澳洲九天吧。 行程安排：布里斯本2日 (市內、南岸公園 South Bank Parklands、龍柏樹熊庇護所Lone Pine Koala Sanctuary) --> 黃金海岸3日 (衝浪者天堂 Surfers Paradise、市集 SURFERS PARADISE BEACHFRONT MARKETS、鴨子遊 Super Duck Tour、華納兄弟電影世界 、捉泥蟹) --> 墨爾本4日 (Skydeck、維多利亞市場 Queen Victoria Market、St Kilda Beach、淘金場疏芬山 Sovereign Hill、企鵝島 Phillip Island、大洋路 Great Ocean Road) Day 1 抵達布里斯本 抵達時間是當地朝早十點半，立即去租車公司拎預先訂好的車。在車上研究一番後先發覺租車公司比錯左冇GPS嘅車我地。於是返轉頭同職員講要換車，結果一點先出到市區。 第一日到埗，加上之前一晚係飛機過夜我都預大家會冇咩心機玩，所以邊到都冇諗住去, 淨係諗住係CBD (市中心) 四圍行下睇下野。 有座教堂仔係市中心。 單就教堂而言完全講唔上靚，歷史亦肯定唔長，同歐洲動輒上百年、千年的教堂完全冇得比。不過係商業中心中間，玻璃高樓隔離有一座設計簡單的小教堂，比人個感覺好特別，但又唔覺突兀，同周圍環境好夾。 亂咁行見到座咁宏偉嘅建築，特別望多佢兩眼。The Treasury?？唔通係政府財政部？點解咁多人出入？無知嘅我入到去先發現原來係賭場！偉大的母親大人呢個時候話點都要入去玩返兩手，於是我地就入左去喇！不過賭場入面唔比影相，所以都冇相比大家睇。 The Treasury門口就係Brisbane Square 放左幾個大鐵球係到，應該係屬於裝置藝術嘅一種，但我唔明佢想表達啲咩。不過都好正常，咁易明就唔係藝術品啦~ 穿過Brisbane Square過橋就可以去到布里斯本南岸 (South Bank)。過橋後，甚至企係橋上面睇到嘅已經係截然不同的風景。 過橋之前CBD係商業中心，而南岸相對就係藝術文化集中點。 藝術中心、展覽館都係位於南岸。南岸亦都係布里斯本係1988年舉行世博會的地方。有啲當年為左世博會興建嘅建築同設施係世博會結束之後冇拆走到，繼續留返係到比大家參觀。
