已經步入八月尾，相信唔少今年既畢業生已經搵到自己想要既工作，我身邊都見到好多同屆同學已經投入左社會大學一兩個月或者甚至提早過埋試用期。唔知道作為讀者朋友既你地又有沒有試過好似我咁，一直都搵唔到願意俾工作機會既公司呢？如果有既話請你in-box我既Facebook專頁同我分享一下，因為最近既我處於煩惱當中喔。 因為我面試過好多公司，收集左唔同搵工經驗，所以我好想分享俾你地知道！我係分享「十個搵工可能會遇到既情況」之同時，都會講講自己既小心得！因為從失敗當中，我提高左情緒智商，調節左心理素質，確定左自己將來既發展路向 (正能量)。 一. 對社會大學既恐懼 身邊有唔少剛畢業既朋友都同我講：佢地唔想返工。我絕對可以明白，當做一個大學生既時候生活可以無憂無慮，誰又會願意咁快走出黎搵工呢？家庭有經濟支持既人尚可以容許佢地找藉口繼續讀書進修，俾佢地暫時逃避社會既殘酷。但對於無條件既我黎講，一來自己又無錢繼續進修或者生活，二黎無親人介紹工作，雙無既我只能夠勇敢面對搵工既所有困難。 換個角度睇，如果一早出黎搵工做野，你所擁有既工作經驗一定會比繼續進修既人多。邊有人可以肯定，繼續進修既人master畢業既時候會比較容易搵到工 (對一些為讀而讀、無人生目標既人黎講)？事實係有唔少公司都唔傾向請碩士生，因為怕佢地死讀書，另外係佢地比一早出黎搵工既Degree Fresh Grad更加無工作經驗，如果要揀都揀個fresh grad啦。除此之外，依靠人際關係既事實亦係悲慘，因為你往往要成為他人既話柄，雖然其他人表面上仍然尊重你，但佢地其實係睇唔上你無個人實力！所以我又唔會太悲觀！共勉之。 二. 石沉大海 邊個話讀書讀得好就一定會有好工作？無論你係大學讀得幾好，無奈既係出面公司只會睇你CV上有沒有相關經驗，當一眼見到你係Fresh Grad，其實都已經將你當做一張白紙咁睇。初初send履歷表既你可能會慢慢發現，自己要開始接受CV石沉大海既現象，然後Let it go。 唔想CV一一石沉大海，你要改變策略！會唔會係因為你無一封展示個人優勢既Cover Letter？會唔會係因為你CV呈現資料既方式太唔吸引？會唔會係你CV太多頁數？會唔會係你CV有文法錯誤？會唔會係唔懂得點樣從文字上表現自己？公司第一個睇你CV既人多數都係人事部同事，而人事部同事只會花平均好少既時間瀏覽你既履歷表。如果佢地精明既眼掃描到任何錯誤，好大可能會令你失去好多面試機會喔！ 三. 一時了無消息，一時邀約太多 當你改善左搵工策略，你又會有另一個問題……一時間突然有好多既電話邀約。有電話邀約係一件值得開心既事，但依個時候你首先要做既係好好舖排自己既時間表，等自己唔好錯失任何一個面試機會！即使有部分公司唔係你既首選，但有時佢地既工作內容亦能讓你改觀，所以俾自己唔同機會，嘗試唔同既面試。你亦能夠從中學習說話技巧，當遇到自己最想要既面試機會既時候，你就會更加有信心！加油喔！ 四. 煩惱衣著打扮 衣著又係另一個令人頭痛既問題。究竟點樣著先會令公司滿意呢？我最初由著出一件OL返工衫，到見到好多一齊面試既人都著更正統既Black and white，直至而家我都選擇著一件白色裇衫配黑長褲見工。改變我決定既原因，第一係唔想自己被比下去，第二係因為希望著Black and white既我可以讓對方感覺自己對面試既尊重。雖然我都好想著出自己風格既衫，但我都係乖乖咁等人地請左我先咁做啦 ! 特別要提及既係見工鞋，請大家唔好著一對令自己受苦既鞋周圍去見工，因為咁樣真係好辛苦！寧願花少少錢買對比較舒服既鞋去長期作戰，咁就唔駛好似我咁成隻腳貼哂膠布啦…… 五. 化身為路痴王 對於路痴黎講，最辛苦莫過於搵路去面試地點。對於依樣野，我個人無咩要補充……一日係路痴，永遠都係路痴。奉勸同我一樣既人，早點出門口，早點係Google Map搵定路、Cap低圖俾自己，預多D時間俾自己摸路，咁樣就無問題啦！如果真係搵唔到路既，要訓練自己要主動問路人喔，相信識路既香港人都會樂意幫你點出方向既！ 六. 過五關斬六將 今年經濟衰弱，好多公司都對請人比較審慎，好多時候即使公司俾你第一次面試邀約，你成功後唔代表你有多大既機會。因為你仲要過埋第二、第三次面試先至有機會！點解會有咁多round？第一係佢地要睇你既潛質，第二要睇你能唔能夠同其他同事相處得黎，第三要睇你既素質可否同公司既core value配合到，第四要睇你既expected salary會唔會要求得太高，所以又要約多次出黎傾價，第五係因為佢地根本唔急請人！當你完成依個禮拜既First in之後，要等下個禮拜既second in，去到最後third round既時候就已經渡過了一個月既光景……但對方公司最後卻選擇另一個人上任了……要係咁樣既環境搵工，相信大家都幾無奈。 點算好？搵工既你只能夠盡力而為，然後就Hope for the Best！ 七. 無經驗 = 零？ 無經驗真的是零嗎？其實要有經驗先可以有工作，定係要有工作先可以有經驗呢？依個疑問就好似雞同蛋既問題一樣，永遠都解答唔到…… 奉勸所有仍然讀緊書既朋友一定要趁係暑假拎多點全職或者兼職工作經驗！到時俾人問起既時候，你地都可以靠依D工作經驗打開話匣子，增加對方對自己既好感。 八. 朋輩壓力 當你身邊既朋友都搵到工，而你仲未有好消息既時候，你會開始有壓力…… 依種時候你可以做既係好好調節自己既心理，然後繼續努力搵工！ 九. 家庭壓力 如果屋企人等你份糧開飯，建議你就唔好再猶疑，先找一份工作，然後再繼續搵自己喜歡既工作，邊個話第一份工一定係你最鍾意？好多人大部分既工作時間都係去搵另一份工作。人生流流長，你絕對可以尋覓到一份自己既Dream Job！ 但如果屋企唔會因為你要幾個月時間待業而無飯食，咁我建議你都係努力等、努力搵，如果生活費唔夠就做住Part-time，我相信大家一定會搵到自己既理想工作！ 十. 夢想定生活？ 如果仍然無公司願意俾你夢想中既工作機會，咁點算？我相信夢想唔可以放棄，大家仍然要保持信念，但你可能要為生活而作出先後次序。我有想過，如果我最後畢業後都做唔到一個編輯，我會選擇先找一份能夠容許我繼續進修既工作，然後利用工餘既時間去學習Journalism或者Digital Marketing，增加自己實現夢想既機會。 我仍然在等待機會，努力尋覓自己既Dream Job！你呢？ 我係網上面見到一句句子，依句句子對我黎講係一個鼓勵： 「如果事與願違，就相信上天一定另有安排；所有失去的，都會以另外一種方式歸來。相信自己，相信時間不會虧待你。」 我亦將依句送俾所有同我一樣既人，祝大家搵到自己理想既工作，為前途努力！ 喜歡這篇文章嗎？邀請你到我的Facebook專頁按讚或分享！
