作為冇養貓既貓奴，我間唔中都會去下貓咪Cafe或者貓咪遊樂場探望貓咪，以補充正能量。今次我會為大家帶黎五間香港「貓咪樂園」既介紹，又會就食物、環境、駐場貓咪等等提供個人意見同評分。睇下邊間最啱你心水啦！ 1. 阿貓地攤 ♥♥♥♥♥ 我會非常推廌位於銅鑼灣既阿貓地攤！ 第一件事係因為依度既貓咪比較鍾意露面，非常之有活力。你想像一下，如果你突登走去一間貓咪，你都係希望一邊食野既時候可以一邊有貓咪陪自己啦。所以當阿貓地攤既貓願意親近你 (即便佢淨係坐係隔離)，你都會覺得好幸福！第二我要特別鼓勵貓奴客人點佢地限量供應既貓咪造型曲奇，因為佢真係非常好味！第三要睇環境，地點非常近銅鑼灣地鐵站，而且餐廳內比較安靜，適合三兩知己或者情侶黎傾計食野。第四，我好欣賞餐廳店內既貓咪裝飾。除左牆上有靚「貓畫」，每張臺上面都擺放一本貓貓手冊，手冊話比大家聽同貓咪相處既注意事項同埋介紹貓咪既名。最後一樣特別野係精心設計既會員卡。雖然間餐廳話只係招待會員，但其實第一次幫襯既人都會收到會員卡既。下次再去既時候，客人就會有一種莫名既歸屬感啦！ 地址: 銅鑼灣富明街2-6號寶明大廈3樓D-E室 預約電話號碼: 2710-9953 營業時間: (一至日) 12:00-23:00 2. 喵星球貓咪主題樂園 ♥♥♥♥ 喵星球環境安靜，裝修獨特，簡潔乾淨，你地可以同貓咪們影唔少靚相架。我建議貓奴選擇平日下午既時間去，第一係因為平日會比較少人，第二係因為店內既貓咪幾乎都醒左陪你玩！當時既我就當然把握機會同貓貓玩到不亦樂乎啦。依度有唔同品種既貓咪，有願意比你摸摸同抱抱既，亦有唔願意比你親近既，所以貓奴到時要向店員請教下啦。不過，樂園既店員對新黎到既客人都非常親切，如果佢地抽到時間既話都會逐一介紹唔同貓咪既名同習性。依間店仲有一個好處，客人比左入場費之後，基本上可以無限時地逗留，直至你認為夠鐘走為止架！大家係咪好心動呢？至於食物方面你地都要留意下，入場費係唔包括提供任何食物 (我上次去既時候送左飲品一罐)。如果想一路食一路睇貓既話，可以即場叫外賣返黎，最好既情況當然係先食飽再黎啦。 地址: 銅鑼灣景隆街6號渣菲大廈4/F (近SOGO，銅鑼灣地鐵站D1出口) 預約及查詢入場費電話號碼: 2803 4828 3. 貓店街 ♥♥♥ 我上次去貓店街既時候人係夜晚，當時實在太多人啦，所以比較難見到貓咪 (Sad)！所以我真心建議你地揀人少既時段去會比較好。食物方面，味道唔錯 (推介客人點佢地既無骨雞翼)，只是食物價錢略貴喔。另外，客人係等餐既期間，可以玩住店家提供既桌上遊戲先。桌上遊戲有唔同種類，最適合一班朋友去gathering啦。 地址: 旺角西洋菜南街1A號百寶利商業中心14樓1401室 (港鐵旺角站 E2 出口) 預約電話號碼: 6221 1779 營業時間: (一至四) 12:00-00:00 (五至日) 12:00-01:00 4. 貓之茶房 ♥♥♥♥ 貓之茶房有唔少貓，當時我影左唔少貓貓既靚相，上圖個兩隻係我最中意既貓 (係咪超可愛?????????????)！食物方面，我上次食左一個便當，價錢都好合理！環境方面，地點雖然對我黎講唔係太方便 (荃灣區居民除外)，但餐廳勝在地方大，可以見到貓咪們係店內走黎走黎，真係好治癒……餐廳仲有一個特點，佢地要求客人坐地椅，咁樣就可以更加接近貓咪啦！ 地址: 荃灣大河道45號樹勳樓1樓 (港鐵荃灣站 A1 出口, 步行約4分鐘) 電話號碼: 2149 6261 營業時間: (一至日) 13:30-23:00 5. 梅子貓舍 ♥♥♥♥♥ 梅子貓舍店內既佈置非常優雅復古，佈滿好多貓咪既小裝飾，十分適合文青型既貓奴去試下！店內播住優美既音樂，環境令客人好放鬆。食物方面我點既係滑蛋咖喱飯，咖喱飯好好食，而且價錢都算合理啦。餐廳老闆好友善，因為我同朋友睇任D貓咪超過一個鐘，佢都有主動黎同我地傾下計。可能太舒服既關係，唔經唔覺留左好耐！ 剛好上次去既時候，梅子貓舍既貓貓都醒晒等食晚飯，所以我可以同朋友見到貓咪們係天花同地面行黎行去，超捧哦。原來梅子貓咪們係有族譜架，唔同既族排名代表住貓咪係店內既地位，貓奴去到依間店可以留意一下佢地既氣勢，或者就會知道點解 ~ 地址: 觀塘成業街15-17號成運工業大廈14樓3室 (港鐵觀塘站 B2 出口, 步行約3分鐘) 電話號碼: 9128 7239 營業時間: (一至五) 12:00-22:00 (六至日) 13:00-22:00 想知多D關於我去每間貓咪樂園既情況，歡迎到我既Facebook專頁in-box聯絡我！ 最後要多謝我既助編妹妹，個幅有三隻貓貓既圖係佢花好多心思設計出黎架！
