香港動漫及電玩節已經完美落幕，展覽活動當中最令人留下深刻印象既一定係由野士創工公司所設計、香港首個VR 遊戲既「香港感染」。遊戲出自本地漫畫家謝森龍異既作品《香港感染》改編而成，以「香港立法會打喪屍」為主題，讓玩家感覺置身於3D病毒爆發現場，同一班恐怖到震既喪屍搏斗！ 到訪遊戲展覽後既我受到啟發，分析出香港藝術發展既5個現象： 一. 藝術遊戲化 好多出名既動漫都會為自己延續一系列有關既電子遊戲，供粉絲繼續熱捧，但佢地大部分都係黎自日本或者外國公司，始終開拓既市場比較大。令我欣賞既係「香港感染」既大膽創新！透過依個遊戲，更多香港市民加深左對漫畫家謝森龍異以及佢唔同種類藝術創作既認識。本人鼓勵依個趨勢，亦期待將來有更多創新性既交流合作。 二. 藝術大眾化 依次展覽令我更明白，藝術唔再係某種社會階級先識得欣賞既事物。講起藝術，唔一定句句係經典名畫或者雕塑既。其實當藝術變得大眾化，好似街頭塗鴉同平民漫畫 (舉例有老夫子啦，我的最愛！)，可以更令人接受、理解同發掘出藝術非傳統既不同可塑性。除此之外，願意承繼藝術創作工作既年青人亦會更多！ 三. 藝術政治化 感性野就講完，大家見到隻巨型怪物，唔駛問阿貴都會聯想到香港政治人物Tree根啦。除左意思關聯到立法會議員身上之外，遊戲亦同時加插左「雨傘運動」既故事情節。事關遊戲設定雨傘運動為故事背景，玩家需要擔當正義之士，一邊前往立法會大樓一邊打喪屍。當漫畫同政治扯上關係，就會容易俾人批評係抽水既行為，但你又有想過嗎？正正係咁樣，「香港感染」先會吸引更多人既議論同關注，事實上對本地漫畫界帶黎正面既衝擊作用。 四. 藝術本土化 遊戲或者漫畫之所以命名為「香港感染」，係因為佢加入好多本地時事性元素，例如熟悉既黃傘、警車、警員制服、壓止示威人士既催淚彈、旺角行人專用區，仲有香港立法會大樓等等常見既大廈。雖然遊戲屬於初步發展既「香港感染」係技術同畫面質素上唔及外國頂尖VR遊戲，但最能夠引起香港人共鳴同回憶既VR遊戲或者動漫設計就非佢莫屬啦。 五. 藝術科技化 最後研究藝術科技化既利與弊。先講好事，就個人而言，藝術係多元化既，除左傳統手工業、繪畫、雕塑、寫作等等，我亦視電影、電視節目、演技、漫畫、電子遊戲為藝術之一。總之，當一件事物有左值得人欣賞既「價值」或者「美感」既時候，某程度上佢就係一門藝術。科技如果令二維事物變得更生動，令事物既藝術性有增無減，都值得鼓勵。 當然科技化亦有隱憂，佢會令大眾追求娛樂性既一面，忘記左佢本身既藝術性同漫畫家背後所花既時間同心機。當依個遊戲唔再滿足香港人既娛樂需要，好可能又會被人漸漸忘記…… 因此，與其一面倒注重「香港感染」既娛樂性，我會更重視佢既藝術可塑性。你又聽過依個遊戲未呢？你又認為佢對本地藝術發展創造出咩可能性？歡迎同我討論！ 喜歡這篇文章嗎？邀請你到我的Facebook專頁讚好！
