唔知大家回憶中既畢業旅行順唔順利呢？我既畢業旅行就唔太順利啦，由當初六個人開心地出發，變成五個無奈人加一隻憤怒鳥返黎。回想返個次旅行，我得出以下十個去畢業旅行可能會犯既錯誤…… 獻俾同我一樣經歷過畢業旅行不順既人同所有想去畢業旅行既同學仔。 一. 做自由騎士 唔只做Project既時候會有freerider問題，就連同你係大學幾friend既朋友都一樣會做自由騎士。講明係自由騎士就即係旅行出發前無任何實際頁獻，由訂機票、Book酒店、搵旅遊資料同真正Plan行程都無參與過。同咁無承擔既人去旅行，你話死未。有時越好朋友，就越容易出現依個問題，因為大家都清楚互相既性格。如果唔想友情破裂，最好都是幫下手啦！ 二. 去與唔去的邊緣 無論突然唔去既原因有幾咁芝麻綠豆或者重要，既然之前應承左同朋友去畢業旅行，就應該好好向朋友交代 。如果唔去，就講清楚，好讓朋友有第二手準備。如果Book酒店既時候唔駛預多一個人，是可以省好多錢的。真是好想唱一首「去與唔去的邊緣」…最令人頭痕就是遇到猶疑不決、要去又話唔去既老友，即使佢最後還是去，都已經換唔返朋友既尊重…… 三. 一時要威一時戴頭盔 好多人去畢業旅行既時候最容易發生意見不同。如果討論當中只是一味反對其他人意見，而自己同時又俾唔到實際既代替方案，會好容易令人反感。想反對之前，好好係對方立場著想，即使諗唔到代替方案，亦可表達一下想法，或者可以幫助其他旅伴找到靈感！ 四. 諸多挑剔 需要知道行程安排有時未必會令所有人滿意，而且好多時意想唔到既狀況都會出現，無人能夠控制……如果作為旅伴唔夠諒解，又要投訴旅程唔合心意，其實都幾令人無奈……我地要尊重行程計劃者既選擇，感謝佢地背後既付出，先可以令友情更進一步。 五. 懶訓豬 呢個問題其實好相對，如果你所有旅伴都係一樣懶訓豬，咁絕對無問題。但如果有人想一早出發，有D人卻希望訓到一兩點先出發，咁就好難說了……要好好溝通，共同商量一個大家滿意既起身時間啦 (雖然難…)！ 六. 唔合群 唔同人有唔同既生活節奏，但出得黎一齊旅行就要跟大隊。萬一plan好哂去幾個地方既時候，有旅伴只想留係一個地方全日，或者當一伙人傾好去A地點既時候，佢就突然想去B地點，咁樣好考驗其他人對佢既包容性……盡可能的話尊重大隊既決定，係再次商量行程時再將心入面想去既地點拎出黎傾！ 七. 斤斤計較 斤斤計較既旅伴就係咩都同你計到盡！永遠都係佢搵你幫手，當你想要搵佢幫返你手既時候，佢總會有一千種理由推塘你！難得有緣份一齊旅行又何必咁樣呢？ 八. 唔表達意見 旅途中一齊相處，總要接受其他人唔同既生活習慣、說話或者決定。當對方有地方令自己感到不快，你有兩個選擇：一，選擇沉默，並且包容朋友；二，將感受話俾朋友知，希望朋友能夠改善。記住，朋友唔係你肚入面條蟲，你唔講人地永遠唔會知！ 九. 粒聲唔出嬲鬼你 我既畢業旅行出現左一隻憤怒鳥，無緣無故地嬲左成村人……但被嬲者又唔可以問隻雀因咩事咁嬲，因為咁問會突顯自已既唔理解，總之就是迷茫……去旅行係為左開心架嘛，又何必要咁嬲拎氣黎受呢？而且嬲既前提又有冇考慮到其他人既感受呢？ 十. 冷戰 係畢業旅行入面無那那嬲人已經可笑，最奇葩既係你發現佢一D都唔想理你，亦無講出改善既條件，直至旅程既完結……方丈大人真是好小氣，對住呢種人你既方法無他，嘗試請求溝通失敗，就唯有無視。 以上係十個畢業旅行常犯既錯誤及小心得，希望對讀者們有幫助啦！ 喜歡這文章嗎？邀請你到我的Facebook專頁按讚！
