一直都好想同大家分享我既生產經歷 一年後既今日我終於捨得打番出黎💭 我係大約6周既時候已經發現有BB👶🏻 然後由第7周開始嘔到22周🤮 一直都好糾結究竟去私家生定係政府生 但我一心想係順產 因為覺得人一世 物一世都想試下女人最痛係咩感覺(大癲) 👿亦冇諗過要無痛 加上係15周確診左甲狀腺過高所以最後決定都係政府生 而我選擇既係東區醫院 (近屋企人加上feedback較好)👍🏻2024年7月3日我既預產期係7月6日 而我最後一次睇私家覆診係6月28日 當時醫生話我bb已經調左頭 入左盤 係中size bb 所以順產係比較易 咁我當然好開心啦 我就一直等bb出黎 一直等呀等 等到7月3日去政府覆診都未肯出黎 醫生當日同我内檢 真係痛到奔潰 醫生話我宮頸完全唔成熟 都要等下 我就膽粗粗問醫生: 我想催生 因為真係好辛苦 醫生竟然比左聽日期我 我心諗: 咁快 !🫨 不過對我黎講都係好事 我真係想快d完左件事 點知 係我未踏出醫院個下 我已經見紅 係澎澎聲 成條底底都係血🩸然後我老公已經吓到傻左 我即刻入左D7病房 老公就幫我去搞入院手續同番屋企拎日用品+走佬袋比我 👜 其實成件事係好狼狽既🥺 因為我咩都冇 連更換既衣物都冇 護士好快帶我去床度 幫我搏心跳機聽BB心跳 東區醫院真係比較小人..孕婦唔多..BB亦唔多 但我被安排間房係全full 終於等到老公同媽咪黎探我 有人幫我沖涼同拎野食比我🍔 留意番廁所同房係分開既 所以每次都要拎定d野去洗手間 🚾🚽🧻當晚既我係完全休息唔到lol 因為訓係我旁邊既媽媽鼻鼾聲真係好大 而且姑娘每兩個鐘就會過黎幫你搏心跳機 我當下真係想即刻番屋企 💤 2024年7月4日大約早上9:00 有一位女醫生過黎 同我講我bb心跳正常 想安排番我41周先催生 我當下心情真係跌到落谷底 我就忍唔住喊左😭 過左一排 有一位男醫生又過黎問我係咪都想今日催生 我就話係 大約10分鐘後就有位女醫生同我塞催生藥了 我覺得唔係好痛 都冇咩感覺 醫生叫我留意住有冇穿羊水 依粒藥會維持到第二日既 ! 咁我之後就係出面un瑜伽波🧘♀️ 睇下可唔可以幫助快d有反應 一直去到晚上 我都係0反應 直到大約凌晨1:00 我好似feel到有小小水滲出黎 醫生就幫我用鴨咀鉗檢查係咪真係穿水 又係痛到奔潰😵💫原來食白果….自己feel錯 唔係羊水黎的…omg…我又滲血again 全晚都好痛好辛苦🩸2024年7月5日又係大約9:00左右 醫生又黎幫我内檢 子宮頸成熟度10分得3分 要起碼6分先可以去人工穿水落產房😓所以我又塞左第2粒催生藥 醫生話依粒藥係強好多 藥效維持半日 如果半日後再冇反應 就要去塞水球落子宮 水球會刺激荷爾蒙令子宮收縮 依個係一個物理性催生方法💦 然後我就不斷上網睇依方面既資料 我愈睇愈驚 覺得好恐怖 驚既係睇到成功率唔係高 我好怕塞完都係冇反應 我就祈禱啦🙏 希望呀囡你生性啦 比我快d生你出黎🤰🏼 當日下午時間 我被種豆(我諗係實習護士 手勢麻麻) 如是者 半日過去 我都係咩反應都冇 大約晚上7:00左右 醫生再黎内檢 子宮頸成熟度仍然係3分😓 醫生就比左份同意書我 如果同意 今晚就會去塞水球 我當刻即問番醫生🧑⚕️ 如果我唔簽仲可以有咩選擇 醫生答我會當你係催生失敗 安排你聽日去開刀 🔪 雖然我真係好唔想開刀 (如果我要開刀 我一早選擇私家啦) 但我真係唔想再冒任何風險 亦唔想食全餐 因為依3日我都好崩潰 過得好辛苦 每晚係病床都有偷偷地喊 最後決定唔簽同意書 聽日開刀 朋友同家人都一致支持我依個決定💪🏼 當晚12:00開始要禁食🚫 我11:00就食左好幾個包 塞飽自己 當晚我係訓得好好 好安心 因為知道聽日終於見到BB 啦 !👶🏻 2024年7月6日當日起身 我大約8:00就去左沖涼洗頭🛀 過左陣 醫生又黎幫我内檢 都真係0進展 可以安排我去開刀 老公大約9:00黎到 係病房出面等通知 大約10:30左右 有麻醉科醫生過黎同我講解開刀手術既風險 簽同意書等等☝️ 好快就有姨姨幫我剃毛同換衫+内褲 然後我直等 等到11:30探病時間 老公都入左黎陪我 叫我放鬆d🧸 大約12:00 姑娘特然入黎話輪到我啦 咁我就訓落病床 帶好手術帽同口罩 姑娘要推我去手術室啦 我當下心情係驚 驚都完全唔知點反應 去到手術室門口 我終於見到老公👦🏻 個人都安心好多 我剩係記得手術室有幾位醫生 好多位護士 佢地好細心幫我搬床 打點滴 落麻醉藥 全部都好friendly好細心 個個都有鼓勵我💪🏼 打完麻醉藥 亦都confirm我下半身冇哂感覺後 老公就可以入黎陪我啦❤️我見到佢即刻爆喊 佢都係😭 捉住我隻手 講左好多安慰我既說話 個時我係feel到個肚係不斷比人推下推下 然後有一下推到比較大力 bb就出左黎 可能只係15分鐘既事 一個3.12kg既bb就誕生左 係我哋既bb👶🏻 聽到佢既喊聲 我地都再次喊 成個過程比我想像中快 姑娘幫bb清潔左 就比我地抱bb同幫我地影合照📸 BB好準時搭正正日預產期出黎 望到佢抱到佢個下 真係覺得咩苦都值得架 之後老公就要出去 醫生幫我縫傷口 過程都係無咩感覺然後大約係手術室門外逗留左半個鐘左右 確認一切正常 護士就推走我 我之前request左要住特別私家房 所以唔洗再番去D7病房 成個生產個程就係咁 下篇再講我既住院湊B經歷比大家知🍼點擊圖片放大