星期日究竟皇后像廣場逼d定係長洲逼d，我真係唔Q知 我只知呢個賓客人數多的小島，多數人客只係嚟飲飲食食，糯米磁、魚蛋檔，完全忘記了長洲定位為香港悠閒渡假地點的原因------ 長洲的精髓在於簡單易行靚風景的步行徑呀!!!! 上幾回介紹過長洲東南方奇石林立，非常有趣的「長洲小長城」路線，今次我行的長洲北路線 --- 經大貴灣上北眺亭，風景同樣非常優美! 有寧靜清澈的無人海灘，有俯視整個長洲的超開揚景觀! 最重要係假期仍然非常少人! 邊個話放假唔好去長洲? 一於睇完呢篇去輕鬆行個靚山啦! (原本呢一篇拍哂片出vlog，點知個GoPro太弱，條片震到死亡習作咁……Orz) ********去之前，add左我IG和YouTube Channel先啦!~ +++++++++++++++++++++++++++++++++++++++++++++++++++++ 延伸閱讀: 長洲小長城︱驚喜十足的奇岩怪石小徑 【香港郊遊13】 https://travelblog-fung-garcia.com/mini-great-wall/ +++++++++++++++++++++++++++++++++++++++++++++++++++++ 文章概要: 出發前食返餐 – 蓮香again 北帝廟至大貴灣 大貴灣無人沙灘 大貴灣上北眺亭 長洲全景 回程 1. 出發前食返餐 – 蓮香again 又係你阿陳生~ 上次行小長城前食過既「蓮香茶居」，encore仍無令我失望! 沙嗲+炸蒜+蔥本身就係無敵組合，仲要落得夠多夠香! 炸豬扒有幾正不用多說，難得係豬潤又厚又脆，竟不輸深水埗漢發!?? $34 大大碗足料好味沙嗲豬扒or豬潤米，夫復何求? 沙嗲豬扒米 沙嗲厚豬潤米 openrice圖片from A姐m佬 ======================= 「蓮香茶居」 地址 : 長洲大興堤路二號熟食巿場四號檔 Tel : 29817566 ======================= 2. 北帝廟至大貴灣 食完就開波啦~ 先向大貴灣進發~ 向北行------即碼頭一出轉左方向一直行，經過旺角問卷調查般的海鮮店sssss後，見到右方有數個球場，後面就係北帝廟了 有興趣的朋友可以去參觀下~ 不過我掛住去旁邊既洗手間唔記得左……. 去完洗手間向前行至消防局分叉路轉左~ 唔夠5分鐘見到第二個分叉路，唔使理繼續前進~ 唔好轉左，keep行大路得ga la~ 不數步即轉入「長貴路」海邊散步徑~ 藍天白雲，在微風樹蔭下的沙灘小徑輕鬆漫步，即刻有種遠離煩囂的感覺~ 長貴路海邊散步徑 3. 大貴灣無人沙灘 離開沙灘步道向前行不遠便可到達大貴灣~ 雖然佢只係一個普通的沙灘，但奇就奇在星期日長洲，竟然會有一個水清沙幼的無人沙灘!? 真係無人呀!!!!!!!! 我以為去左歐洲d小島既不知名沙灘，好有出國feel呀!! 呢個沙灘僻到咁，莫講話寫大字BBQ，夜晚分分鐘天為被地為蓆，加個床前明月光好詩好詩式狂奔都無問題! 事實上臨走前我就見到遠處一對外國情侶在海中載浮載沉，玩個不亦樂乎 玩d咩? 我鬼知咩 難道真係過去觀摩學習，再將個故事分9集每日輪流不停播放…… (都有少少休憩設施) 4. 大貴灣上北眺亭 大貴灣行到盡頭可見有分叉路轉上「長北路」 之前都係平路，由呢處開始上山啦~ 唔好驚住，都係彎彎曲曲既斜路g ma~ 而且唔算太斜，比起飛鵝山更加小菜一碟~ +++++++++++++++++++++++++++++++++++++++++++++++++++++ 延伸閱讀: 飛鵝山芒草之行【香港郊遊8】 https://travelblog-fung-garcia.com/kowloonpeakmiscanthus/ +++++++++++++++++++++++++++++++++++++++++++++++++++++ 行大約10分鐘會見到下圖呢個分叉位指上北眺亭 大家可以照上，又或學我咁行前幾步轉個灣，望埋呢個傳聞中的港版鳥居先啦~ 分叉路往右係落山的 此鳥居位處的公園名稱於google map和長洲地圖上都找不到，只有數篇文章不肯定地叫佢配水庫公園 or 長洲北社公園 Anyway，呢個位唔少網紅都話「好有日本feel呀~」「好似返左日本好浪漫ar~」 IG上的打卡照更是不計其數 但我可以非常公平卻又主觀地講句 ------- 真係唔係想像中日本feel 首先此鳥居暨公園明顯是飽歷風霜兼欠缺維修，外表非常殘破，even我當日天氣超勁好，甚至有陽光照射，仍然比到我一種陰沉的感覺 再者，我完全找不到為何在長洲呢個唔la間既地方會起一個日本鳥居的原因 而鳥居本來就是神域的門戶，再望望四周一舊舊白色大石，異形蛋咁奇怪地棟係度，加上長洲係出名「好邪呀~」既地方………………. …………………… 好啦應該係我多心je~ 不過我唔會天黑後過嚟，亦唔多想係度影相law……… 長洲鳥居，總係覺得怪怪地....... 5. 北眺亭 穿過鳥居轉左上樓梯，幾步路就來到長洲北的最高點北眺亭啦!!! 北眺亭，呢種風格香港的山野真係好多~ 望出去個view真係幾唔錯~ 下面就係長洲東灣仔 講真個亭真係無咩好睇，咪又係方形尖頂咁既樣，咪又係例牌有大媽遮遮訓係度長期駐守，係青衣自然徑、尖沙咀訊號山花園見得多啦 其實主力重點係-------- 北眺亭前方呢條山脊樓梯呀!!!! +++++++++++++++++++++++++++++++++++++++++++++++++++++ 延伸閱讀: 青衣自然徑︱馬灣海峽+青馬大橋無敵日落美景【香港郊遊10】 https://travelblog-fung-garcia.com/tsing-yi-nature-trails/ 訊號山花園︱尖沙咀鬧市中的秘密綠洲【發掘香港5】 https://travelblog-fung-garcia.com/signal-hill-garden/ +++++++++++++++++++++++++++++++++++++++++++++++++++++ 呢條山背脊樓梯先係行程重點! 這條延綿下山的山脊樓梯都算幾震撼下! 只要無人的話，影靚相打卡無難度呀~ 睇 下d少女bra top KOL係邊度先~~~~~~~~~~ 頂，真係無人 6. 長洲全景 無靚人唔緊要，有靚景咪得law~ 沿山脊樓梯行落去，就係全程最靚的長洲全景ar!!!!! 睇相睇得多，原來要睇哂成個長洲個位置就係呢度!!!!! 左方盡頭就係上回寫既長洲小長城花坪石~ 呢個長洲全景view無得輸呀! 沿路行落去的風景其實都差不多，除非想落東灣玩，否則唔建議辛辛苦苦行落去，一陣又騾仔式死魚行返上嚟 而且中午過後東灣極速變暗，都無咩需要特登過去啦~ 留返係北眺亭附近欣賞超大咸蛋黃好過啦~ 東灣仔 例牌要chok下~ 7. 回程 想回到長洲中央，最快方法係原路回到鳥居，再行左前方分叉路一直輕斜路落山約15分鐘即可回到北帝廟，非常簡單~ 沿路有一超級勁靚睇日落位置，就係下面呢張相啦~ 欄杆下方就係"人地""屋企"了........... 係咪唔錯先~~~~~ 但請勿太興奮並保持安靜，因為下方有大量古老住宅 um…… 正確d講係古人住宅……. 咁靚既風景地點，明顯係風水地啦，起返幾百間左右好正常啦…… 所以我張相cut哂下方，一個唔覺意見到佢地擺pose就唔係幾好啦 可憐我見到3個大學生貼住欄杆大叫「wa好正呀!!!!!!!」 希望佢今晚唔會太正啦………… (同場加映事後啤~$5一罐咁抵，仲有咩要求呢~) 好啦今次長洲北既行程就係咁多~ 例牌既注意事項~ 我全程連影相玩左兩個半鐘，如果純粹齋行的話，一個鐘多d應該綽綽有餘。但沿途都無補給和洗手間，建議係北帝廟附近攪掂先~ 整條路線除左上北眺亭果幾級和山脊往東灣一段外全程無樓梯，輕鬆簡單，老人家也該能應付 如果大家有時間耐心磨到夜晚的話，此路線係其中一個絕佳的睇長洲夜景地方，甚至有人話有函館夜景feel tim! 不過入夜的山頂非常凍，而且漆黑一片，蚊蟲極多，最佳攝影位置亦在崖邊，小心變左玩無繩笨豬跳呀! ==================================== 請大家FOLLOW我INSTAGRAM啦~ Instagram : https://www.instagram.com/fung_garcia_backpacker/ ===================================== 我既Youtube Channel已經開通啦!!!! 快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~ 鋒加西亞/旅人瘋語 Youtube Channel 主要影片 ： 【泰國】【芭堤雅】誤入邪骨!? 芭堤雅色情行業真相! 【歐洲】人有三急在歐洲怎辦? 卑鄙無恥! 歐洲免費廁所全攻略 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊! 【希臘】型爆海盜船酒吧扮魔盜王！超值60蚊一杯包遊船河！？ 白濱系列 : 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄! 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!? 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住! 旅行故事系列 : 【台北】誤闖台灣三溫暖，內裡竟然係……嚇死人咩！ 【格魯吉亞】最慘的4小時! 格魯吉亞地獄小巴之旅! 【波蘭】在納粹集中營，我竟聽到了……一世難忘的恐怖回憶! ================================= 相關篇章 : 香港郊遊系列 １小時內攪掂 ： 《005 – 沙田行去慈雲山，原來超級簡單》 《006 – 大埔三門仔，零難度的全海景輕遠足》 《009 – 粉嶺鹿頸至谷埔︱夕陽下的隱世蘆葦田》 《011 – 大美督家樂徑︱4大隱世絕美風景》 《013 – 長洲小長城︱驚喜十足的奇岩怪石小徑》 《014 – 紅香爐峰10分鐘極速攻頂︱維港日落全景最佳選擇》 《015 – 西貢泥涌︱大海、夕陽與天空之鏡》 ２至３小時行完： 《003 – 香港仔自然教育徑》 《007 – 西貢大灘郊遊徑，長者行山無問題》 《008 – 飛鵝山芒草之行》 《010 – 青衣自然徑︱馬灣海峽+青馬大橋無敵日落美景》 行完會攰： 《001 – 夜登鳳凰山︱我得罪了日出之神》 《004 – 赤徑與鹹田灣，宛如沙巴的美麗海灣》 《012 – 上窰郊遊徑+曝罟灣堤圍︱超強打卡+輕鬆行山首選》 《002 – 簡單快速+靚景，龍蝦灣郊遊徑》 發掘香港系列 城市偷閒系： 《1 – 香港Staycation首選，皇家太平洋酒店住後心得》 《2 – 城市步行︱鯉魚門的絕美日落》 《5 – 訊號山花園︱尖沙咀鬧市中的秘密綠洲》 《13 - 銅鑼灣避風塘堤壩︱維港海中心看夕陽︱鬧市的避世角落》 影相打卡系 : 《2.5 – 鯉魚門石礦場︱夕陽下的芒草群》 《3 – 己連拿利︱港島攝影秘景，宛如荒涼未來的異世界》 《6 – 石峽尾公園粉色牆壁︱網紅火熱打卡點實測》 《8 – 歌連臣角炮台打卡位︱網紅不會告訴妳的兩三事》 《10 – 白樓「機場核心計劃展覽中心」︱夏天影相一流地點》 《11 – 孫中山紀念館︱Mirror教主MV拍攝場地，真係值得去打卡?》 美食推薦系： 《4 – 香港的希臘小店，味覺的新衝擊》 《7 – 石峽尾一日遊︱美食推薦+文青打卡位懶人包》 《9 – 愛文生大排檔︱性價比超高的街邊豪氣滋味》 《14 - 銅鑼灣鐵板燒小店︱日本水準的大阪燒》 =============================== Email : funggarcia@gmail.com www.facebook.com/Garcia.in.Germany https://mewe.com/p/fung_garcia_backpacker 文章同時刊於以下平台，請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium
