3/12/17 晴 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 14 Day 5 - TeamLab舞動藝術展及未來遊樂園/東門/小飛象泰國餐廳/回程返港 終於黎到桂林深圳之旅最後一站,亦係我最期待的環節,TeamLab展! 之前睇左好多介紹,亦見到好多人去左,無諗到自己都有機會去. 咁岩個展做到十一月尾,我地就把握住呢個尾水,用平日優惠入場. 因為場館無派發實物場刊,而我地咁岩無法用QR code開到電子版場刊,所以其實我地對唔同展區一無所知,見到有咩就玩咩. 以下展區主題引自網上blog,內容都幾詳細,方便大家參考: 【teamLab 深圳】 結合藝術與科技 超夢幻互動視覺盛宴 - Lekoland http://lekoland.com/922/teamlab%E6%B7%B1%E5%9C%B3 ＜呼應燈森林 Forest of Resonating Lamps – One Stroke ＞ 第一個展區就咁靚,又識著燈仲會變色,搞到人掛住響度影唔捨得向前走. 同埋呢間房如果再大啲就正,因為啲人流聚集晒,點影都會影到隔離有人,有點可惜. Anyway,呢度係幾impressive既,因為睇番鏡的反射,會感受到一種節日的璀璨. ＜串聯吧！積木小鎮 ／ Connecting! Block Town＞ 呢度係for小朋友玩既小型interactive floor,將積木搬黎搬去,屏幕就會有不同的動畫構圖,相當互動. ＜光球管弦樂團 ／ Light Ball Orchestra＞ 有波玩梗係正,好想攬住中意既顏色球影相,但一抱起佢就變色,睇番網上先知原來真係一掂就會變色,不過認真幾得意.彩色好七彩繽紛. ＜彩繪城鎮 ／ Sketch Town＞ 另一種互動形式的體驗,每位入場人士可憑門票換取一張畫紙,可以揀中意既圖案,然後響框線入面自由畫畫或填色. 畫完就交俾職員,scan一scan就可以project上熒幕,跟住其他公仔一齊郁,你用手拍落去佢仲識跳動或者扭來扭去,好盞鬼. 我覺得玩呢個既秘訣係要識得幫邊框填色,畫粗條邊框,成個圖像投射出來會較為突出,同埋都靚啲. ＜花與人，不為所控卻能共生－ 度時如年 Flowers and People, Cannot be Controlled but Live Together – A Whole Year per Hour＞ 個人認為最難理解的光影展區,你睇得明佢啲投影,但你get唔到箇中意思. 同埋因為顏色燈太花太多色,個人拍埋牆影相都十分困難,都唔知點影先靚. 可能係要不斷試位,一次過影好多張,先會揀到一張半張啲色撞得靚啲既相. ＜彩繪水族館 ／ Sketch Aquarium＞ 都係畫畫環節,Sue又係畫得好簡單,我就好俾心機塗顏色,畫左條好煩膠的八爪魚. 發現原來玩呢個要揀水母,八爪魚之類的動物,唔好揀魚,因為project出來會好細,細到睇唔到,搵笨. ＜遠古神靈故事 ／ Story of the Time when Gods were Everywhere＞ 無乜特別,都係一幅好長的interactive floor,你用手拍一拍屏幕上跌緊落黎既星座圖案,佢就會爆開成好多粒星星或其他圖案. ＜水晶宇宙 ／ Crystal Universe＞ 壓軸的水晶宇宙應該係全場焦點,亦係吸引無數人前來TeamLab的一大誘因. 係靚既,無數支LED燈時開時關,一閃一閃,又顯示出七彩繽紛的配搭,隨住背景音樂而跳躍,好有節奏感. 之前以為呢度咁多盞燈會刺眼到盲,但現場睇啲燈都比想像中柔和,都接受到,唔會頂唔順,反而都係搵最佳角度影相方面難啲. 睇晒成個TeamLab展,行埋紀念品店,我地花了兩個半鐘,比預期的一個半鐘多,所以響隔離海岸商場去一去廁所後,都趕番去羅湖果邊食埋晚飯. 我地想快快逛一逛夜晚的東門步行街,所以選擇響老街站出,再步行到曬布站的維景酒店,今次試泰國野,小飛象泰國餐廳. 個豬頸肉炸得唔夠乾,濕得滯,所以食得落口,味道爭少少. 咖哩炒蜆,食落都幾辣下,如果有飯送就岩晒,Sue就覺得幾好味. 乾炒豬肉河,呢味我覺得唔錯,只係份量少啲. 馬拉盞炒通菜,都爽口同埋好味,多多我地都食得晒. 最後整多份芒果糯米飯,拾回泰國之旅的感覺,個芒果都香甜既,同埋飯都多既. 整體呢餐都不過不失啦,價錢方面就唔算特別抵,所以試一次就夠. 返緊酒店拎番行李,就去搭地鐵返去羅湖,過關返黎香港,正式完結我地今次五日六夜的桂林深圳之旅了~
