11/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.10 十六湖郊區旅館/恐怖森林小路 Day 7 - 8 June (Fri) 八日旅程來到第七日,今日行程是咁的: 首先一早起身落街拖住行李搵麵包店買麵包,然後衝去老遠的巴士總站,趕及八點半的長途巴士,前往十六湖 Plitvice. 十六湖貴為國家公園及世界文化遺產,有好多值得觀賞的地方,但我地只得一日時間,去到十六湖附近村莊check in埋,一定行唔晒整個十六湖. 十六湖分上湖及下湖,如果早上入園,係夠時間行畢上湖及下湖,而我地下午兩三點先黎,最多只能行一半,所以行比較著名及受歡迎的下湖. 另外網上有人話十六湖入黑後會有老虎甚至獅子出沒,所以安全起見係天黑之前返番酒店,起碼唔驚太黑迷路先啦. 呢程車都幾耐下,要中途停低稍作休息及補給,之後去到十六湖範圍. 我地因為遲左落實行程計劃(其實都已經早左一個月),結果book唔到十六湖入面某間比較affordable的酒店,只能住離十六湖最近,但都有15至20分鐘步行路程的小小村莊Villa Mukinja. 村裡都係小屋,或者幾層高的民房,而我地今晚入住的叫克內熱維奇別墅 Villa Knezevic. 如圖所示,一間兩三層高的屋子,前面有個青青草地,側面仲有花叢,幾優美的環境. 其實呢度好多別墅都係咁既格局,可能其實係同一個老細黎.但呢區環境係好舒服,好寧靜,好怡人. 呢類平民自家經營的小型旅館,係唔會預先響hotels.com透過信用卡俾錢,而係親身黎到再以歐羅或克朗付款,做法比較原始. 感覺呢間野靜幽幽唔多人住,不過我地都預左,亦可能係啲人已經一早出晒去十六湖呢. 入房睇睇,簡簡單單都算精緻既,不過設備就比較簡陋,例如無冷氣for我呢啲怕熱既人,電視機線路插得唔好無聲音出,最煩係唔夠插頭用. 另外因為呢度位於郊區,開窗的話好容易就有昆蟲飛入黎,最多就係一隻隻細細粒飛蛾,我地響房內仲見到唔知係蜘蛛定蟑螂的物體,捉都捉左隻,夜晚訓教果陣頭頂天花板仲痴住啲唔知咩既黑色物體,但都費事應付,呢類郊區旅館環境衛生水平係比較低啲. 快快趣放低行李,就沿村莊裡頭的樹林小路,步行前往十六湖,亦正式打大佬,可以話係我成個trip最大憂慮的一環. 之所以咁擔心,因為我睇過blog以及google map,呢條樹林小路都幾陰森恐怖下,兩邊都係高樹,密密麻麻.而且完全無人行,因為一來時間唔岩,二來啲人其實係會渣車直接去十六湖正門既. 連trip advisor啲人都話試過夜晚響呢條路見到老虎,話大家要小心啲行,真係眼都凸. 所以就算我地日頭行,都有啲驚,唔驚有賊,因為呢度方圓四里都無人,驚既係動物,我唔覺得依家時間會有老虎咁搞笑,反而驚有蛇,所以咩野外求生理論即刻搬晒出黎講. 呢條小徑其實係有支路既,係石屎路for園區車輛行,其實行果條路係安全既,但就會不斷圍繞山頭來回兜圈,可能行足廿幾分鐘. 所以大家都會抄小路,就十分鐘行完,去到十六湖園區.安全到達,見到人的地方,我地不禁倒抽一口涼氣. 好在巴士可以響村莊對開落車咋,否則去到十六湖正門先停,我地就要拉住個行李行呢條泥石路喇,真係諗到都覺得癲,lol. 唔夠時間食lunch,入園前先響出面既cafe買個包食頂住肚先,再飲支桃茶,呢隻Jana桃茶都好飲,不過都唔夠Cappy桃汁咁正. 少少可惜既係,呢個禮拜園區正維修一段行車路,所以我地揀選的F路線,有一段本身坐園區巴士的路程,依家要靠自己步行! 咁就慘喇,一路蹝多左腳骨力,因為睇番地圖,其實呢段真係幾長下,我地行完F路線已經用左唔少體力,仲要撐埋呢一大段路先返番起點,仲要沿途係無野睇既,救命呀. 更加擔心的是時間,本身已經好趕無乜時間,依家無端端仲要靠步行無車坐,本來只需幾分鐘,依家要多大約半個鐘,真係好驚回程返村莊果陣天黑,lol. 第一次黎,唔知十六湖係點玩法,但一場黎到,點都要入去行架啦,所以都快快趣買飛入場.
