10/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.7 出海遊島 - Komiza嘆早餐/一生人看一次的藍洞 Day 6 - 7 June (Thu) 又係一大朝早要起身,今次無得遲起,因為我地book左one day tour,呢間叫Mayer Charter, The Blue Cave Excursion. 先前做左好多research,提供坐船遊島服務有N咁多間公司,網頁都好多資料,搞左好耐,問埋CS,終於決定呢間. 事關呢種出海團,幾乎全部都會安排參加者有一個游水的session,例如游水入去一個只能游水進入的狹窄海灣Stiniva Bay,又或者響某個沙灘stay一陣俾人跳落海游水. 我地就唔想游水既,所以不斷搵一個行程係唔駛游水,終於揀呢間都係有游水session,但CS話唔游可以逗留響船上,咁就揀呢間啦. 呢間公司唔算大間,要響碼頭搵到個團唔容易,都係靠問側邊其他船公司既人,先搵到佢地所在. 八點鐘開船,呢隻係汽墊船黎,無圍欄,船頭坐八個梗位,駕駛位前面有兩個後靠位,後面就有多四個舒服位. 無計啦,我地俾得唔貴,都expect唔到好似隔離坐遊艇咁正架喇.雖然就咁坐上位有啲恐怖,但你乖乖地坐定響度,都頗為安全既. 乘風破浪,我都第一次咁接近個海,加上今日陽光普照,航船時舒服得黎又涼爽,不過就被海風吹到披頭散髮. 因為第一程船程係最長,要成個半鐘先會到我地第一個目的地,所以導遊都唔講太多,叫船長播下歌,俾大家休息下睇下海算. 大約九點半後,見到我地第一個落地既島,Komiza. 其實Split及外島呢帶既屋都係果種格調,啡紅及啡黃為主調,好似一個度假村咁,好有假日風情. 導遊無特別解釋Komiza既歷史特色,或者可能講左但我地無聽到,haha.總之落船就可以周圍參觀啦~ Komiza可以遊覽的地方不多,除左海邊避風塘之外,裡頭有啲屋仔,亦有球場,郵局,超迷你市場. 其實你會懷疑呢個性質類似長洲的地方,距離Split成個半鐘頭快艇船程,咁偏僻到底邊個會住響度,lol. 呢度其實乜都無,淨係對住個海,俾著我真係退休都唔會住響度呀! 明明食左少少野,但驚下午太晏肚餓,反正有時間,響岸邊餐廳食番個靚早餐先. Konoba Koluna呢個早餐真係靚呀,炒蛋奄列,配埋芝士及火腿真心超好味,同埋好在有芝士所以好飽肚下. 一份呢啲早餐,無野飲,你預大概港幣廿幾蚊,抵唔抵食真係見仁見智. 快快趣食完野上番船,下個目的地係今日旅程的重點,Blue Cave 藍洞. 聽聞藍洞並唔係咁易入到去,有時落雨,潮漲,或者任何不穩定因素,都不會開放.一年大概只有一半時間係開放參觀.而揀六月時間去都穩陣既,暑假氣候會好啲. 不過開放都未必一定係好事,因為藍洞太出名,有勁多旅行團前來,導遊幫我地買完門票,等左好耐先可以排隊上官方的小艇,等小艇期間仲同一個內地交流生傾計. 終於等到上船,由園區的船伕負責開船,沿途向我地講解藍洞一帶的結構及歷史. 小艇轉個彎,好快來到藍洞入口.原來似天然洞窟,又係個洞勁矮,剛好俾一隻小艇駛入,我地進出時都要烏低身以免撞頭,難怪藍洞好多時都唔開放啦. 入到去藍洞,裡頭係大自然果種的寧靜,見到淺藍色的海水,波光粼粼. 呢度係我地另一個bookmark一定要來既地方,依家親歷其境,都幾令人感動. 好似話藍洞之所以啲水係鮮藍色發緊光咁,係因為呢個岩洞頂有個圓形開口,又或者由於岩石既空隙,陽光穿透入黎果陣,與洞裡的白色石灰岩形成折射,造成呢種藍色的光線. Anyway,總之神奇啦.唔親眼睇到,你係會覺得呢啲海水既顏色係P出黎既. 個洞其實好細,隻船響洞入面轉一圈,停留一兩分鐘影相,個導賞好快就完. 人生應該要來一次睇藍洞,可謂增廣見聞,好似其他地方都有藍洞既.
