4/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.4 酒店早餐/Dubrovnik Cable Car/Old Town Market/海鮮午餐/仲大支雪糕 Day 5 - 6 June (Wed) 一教醒來,當然唔好浪費眼前咁靚既海景景色,整兩杯蜜糖水,坐響露台嘆下世界先! 真係好唔捨得呢個景呀,咁近距離對住個海港,我知靚過呢度既酒店有唔少,但我呢啲窮L真係人生少有機會可以享受,所以即管俾我沉醉一下. 收拾行李落大堂check out,跟住去餐廳食酒店早餐.因為酒店唔多人入住,餐廳似乎淨係做早餐. 呢間早餐都幾岩我地口味,淨係蛋都有煎太陽蛋及炒蛋兩款,煙肉,火腿,薯角唔少得. 仲有西瓜提子等生果食,西瓜okay但其他生果就唔太靚,所以都費事拎. 因為有24小時pass,直接上巴士去舊城區,先響紀念品店買Cable Car門票,驚纜車站多人排隊. 響城內想途經郵局去寄埋堆postcard,偏偏撞正郵局暫時關門,旁邊餐廳的侍應同我地講話要晏啲開門,都幾黑仔. 唯有響附近的tobacco shop買住郵票先,再沿樓梯一路向上行,走出舊城區,再向上就係另一個必遊景點,Dubrovnik Cable Car. 驚多人既concern其實係多餘,因為纜車站呢度超少人,可能太早,或者啲遊客分散晒舊城區各處. 成日話東歐啲野平,但我地無揀到物價低的國家,克羅地亞呢度for遊客的設施直頭係掠水. 其實程纜車好短,只係幾分鐘都無,來回就收人150kn,嘩乘出黎港紙即係170蚊. 所以真係要霸個靚位,上山果陣捕捉Dubrovnik最燦爛的畫面. 去到山上,可以有更大空間去欣賞,去讚嘆大自然的美麗. 今次歐洲之旅,成日都抱住一生人只會來一次的心態,所以要好好感受及記住眼前的景象. 其實又係一個好感動既位,我地終於可以親眼睇到從呢個角度俯瞰的Dubrovnik. 山上仲有越野車玩,好似幾刺激,而且有一大片平原可以奔馳,但我地都係專心睇風景吧. 落番山黎舊城區,響好細間的超市兜個圈,又返番去郵局寄postcard,行下行下黎到廣場,呢個日頭會出現既Old Town Market. 市場都係賣蔬果為主,仲有肥皂,薰衣草產品等等,比較細的市場.不過啲攤檔擺一段時間就可能會搬走,騰出空間俾餐廳擺放座位,所以有野想買就要買左先. 參觀埋附近的教堂,就去番market揀間餐廳食lunch.歐洲人都係興響戶外食野,佢地覺得咁樣係最舒服,反而室內環境更加焗促. 咁又的確幾舒服既,有啲涼風,溫度又唔高,幾位男侍應又serve得好殷勤好有禮貌,所以都幾enjoy呢個用餐體驗. 叫左杯Cappy桃汁,覺得呢個桃汁幾特別,味道幾好,凍飲係幾正既.其實都係可口可樂品牌,點解香港無呢? 成日都話要食Fish and chips,結果響Dubrovnik食到了,塊魚柳係真魚肉黎既,一絲絲,唔係麵粉溝出黎,炸皮都脆薄可口,唔錯唔錯. 燒八爪魚,上碟好精緻,好靚的伴碟,食八爪魚要逐小逐小切黎食,因為太大件好難咬得碎,慢慢食,食下食下都飽肚. 仲有生蠔,都係的的骰骰,但佢面頭佈滿左啲唔知咩既珠珠同蔥,就幾特別. 食完飯無幾耐,又走去一間雪糕店買雪糕.呢間要sell下,叫做Peppino's Ice Cream Shop. 唔知係咪因為我地係罕見的亞洲遊客,總覺得店員係俾我地零舍大杯的雪糕,真係愈食愈大球呀~ 真係大得好誇張,本身個cone已經高身,啲雪糕多到向橫發展,頂頭仲插住兩支匙羹,預左你唔會就咁咬黎食. 黑芝麻,oreo,都係好唔錯既gelato,真係拳頭咁大,兩個人都未必食得晒,仲要唔貴. 要離開舊城區了,搭巴士返酒店,落車時響海旁散步一陣,影多幾張相,就返酒店拎埋行李,步行番去巴士總站等長途巴士. 告別Dubrovnik,呢個咁優美咁有歐陸風情的城鎮,雖然短期內唔會,但我同Sue都希望有生之年可以再來. 下一站,Split 斯普利特.
