28/6/18 熱 捷克之旅 2018 Sue & Raymond 1 - 4 June 2018 #thesweetestcoupleineurope Ep.7 一屋都係薑餅人/初嚐傳統捷克菜/布拉格城堡 Day 3 - 3 June (Sun) 搭地鐵由Náměstí Republiky去Malostranská,一出地鐵站口就已經見到個幾靚既花園.響布拉格,真係周圍都係景點. 響大街一間幾大既紀念品店買左好靚既磁石同埋postcard,連埋郵票順便寄埋,慳番去郵局的時間. 布拉格寄postcard真係好貴,成廿幾蚊一張,真係夠食一餐飯,極度奢侈.同埋呢度既郵箱係零舍細,細到你唔覺眼,唔相信果個係郵箱. 沿彎路往布拉格城堡,會經過華倫斯坦宮,聖托馬斯教堂,聖尼古拉教堂.聖尼古拉教堂出面既廣場好靚好有歐陸氣色,忍唔住駐足一陣. 再沿斜路上山,有Sue好期待的Gingerbread Museum,以為呢度有薑餅人精品飾物賣,但見到只有薑餅人餅乾,呢度既人都係諗野比較直接,唔係幾識做生意,haha. 陽光幾猛烈,見到好多雪糕店都好想試,但一路忍口上皇宮食lunch,點知原來果間個view好靚好正既餐廳已經執左! 於是唯有過安檢,食城堡入口隔離既花園餐廳,間野應該係叫Kavárna a restaurace Na Baště. Sue叫個burger,我就試下local既捷克菜,其實睇menu賣相都唔係幾吸引架喇,不過似乎中間幅圖食鴨最無咁伏,所以叫黎試下. 為免唔知自己食左啲乜,我特登影低menu呢一頁,呢個烤鴨叫: Bohemian Plate (Slow Roast Duck, Smoked Ham off the bone, Dumplings, Sauerkraut) 原來係波希米亞,隻鴨脾味道還好啦,係跟酸莓汁,鹹鹹酸酸的,黑炆炆的顏色,反而裡頭個火腿肉又幾好味. 至於果幾片蛋糕定麵包既物體,可以連埋鴨肉食無咁油膩,而另外兩塊綠色既野就真係好難食,因為我好怕食草青味既野. 兩份餐都唔平,但都好大份,味道就一般,其實兩個人叫一份burger都夠食了. 食完遲來的lunch,已經四點幾,就真正行布拉格城堡了. 原先以為入城堡一定要俾入場費,但原來大部分範圍都係免費參觀,只係每座地標既室內某啲空間會封起,只供持票人士入內. 但例如聖維特主教座堂,其實你就咁入去,企響教堂後部,一眼包覽整座教堂,都已經夠做. 歐洲大把呢類教堂,都係咁靚咁有氣派,同埋具有一種震攝力,令人肅然認真起來. 好彩我地早少少入黎,原來教堂開放時間去到四點半,真係差少少就緣慳一面. 再行入城堡,都係好靚既建築同大殿,大部分要有門票先入得,但就咁觀賞外部已經ok,而最尾既黃金巷,聽聞無乜特別,所以唔入去都無所謂. 行出城堡,又係影相打卡既時間,擋開中國及韓國大媽團,好辛苦先影到啲相. 不過原來行過隔離少少,來到旁邊花園位置,仲影到更靚更開揚既景,駛乜咁辛苦同人響出面逼黎影,haha. 離開布拉格城堡,繼續遊走城堡區,有小路行落河邊,可以近距離影下河景自拍,離遠果條就係查理大橋. 再行幾步,又見到一間薑餅人店,呢間係多左有杯賣,但都係九成幾貨品係餅乾,所以都無野買到. 隔離仲有間卡夫卡博物館,就咁響門口影張相就算了,要趕住去查理大橋,追番我地行程既進度.
