12/11/18 陰 台北之旅 2018 Sue & Raymond 16 - 21 October 2018 #thesweetestcoupleintaipei #2 阿宗麵線/永和豆漿/無老鍋 Day2 - 17 Oct (Wed) 正式開展台北之旅,西門町咁多野行咁多野食,早餐店都有唔少選擇. 先去食著名的阿宗麵線,去過台北既你都應該食過,由爽脆大腸,柴魚乾,加湯底組成的麵線. Sue事前已不斷強調唔好對呢碗野有好大期望,因為佢覺得唔好食. 我第一次食落感覺都還好既,雖然都係怕怕地好黏好稠身既湯,但味道未至於鹹到令人難以接受. 不過呢兜野認真滯肚,我地兩個人食一個細碗,都覺得好足夠,純粹試下個味道. 永和豆漿,又係台北必食,多人等位,店鋪比較舊,座位幾逼下,所以我地索性買外賣返Airbnb食算. 豆漿,好滑又夠味,暖暖地幾好飲.起司蛋餅,份量唔多,細細塊,但食幾啖都好飽肚,味道OK既. 油條就一般,比較濕,又腍,唔得香脆,始終都係香港或者大陸果啲做得比較好. 食左兩款早餐已經好飽,好在朝早有個短短的時間,步行逛下西門町的街道及景點. 除左前一晚我地經過左既刺青街,西門町西面有電影街,台北市電影主題公園,呢一帶有大量戲院,可能睇戲都幾平下. 由於係平日早上,加上落雨,感覺街上比較冷清,鋪頭都未開晒,街上都係遊客為主. 點擊圖片放大 +33 行一陣出番去,搭捷運去忠孝復興站,步行一段路前往台北之旅第一個重點,無老鍋! 由於天雨影響我地原先一早定好的行程,臨出發前再調一調,所以今次食既係無老鍋(市民店). 無老鍋係一間好有格調的中高級餐廳,如果你唔book檯,就算當時有位佢都未必會俾檯你,因為佢會reserve俾book左時間既顧客,可以講係唔憂做生意,因為就算係唔就腳既分店,太近的日子都真係會full booking. 第一次食一定係試鴛鴦鍋,白色果邊我地揀左冰淇淋豆腐鍋,真係有幾粒冰淇淋豆腐上檯,幾得意. 肥牛方面就正常,叫左多肥肉的豬肉,魚丸,仲有一個菜.台灣唔興食生菜,如果有生菜就正喇. 另外最正係呢個干貝滑,真係食得出一絲絲帶子肉,有肉質,有肉味,唔係交行貨,好中意呢個. 湯底更加唔使講,無老鍋係sell藥饍火鍋,基本上你一入到間鋪,就已經聞到勁大陣藥材味,配以古色古香的裝修,真係好似返番左古代咁. 我自己係幾怕藥材味既,但呢個湯底食落都接受到,唔覺得好臭,反而幾香,就咁飲都正,唔錯唔錯. 香鍋就辣左啲,怕怕地咁多香料,雖然本身湯底夠清,但我都略嫌有點重口味. 仲有不得不提,無老鍋的豆腐及鴨血,係免費任添的,店員亦好好,定時會主動送上,份量充足,唔使專登加點. 豆腐質素正常啦,唔係滑果隻,鴨血就好滑,切薄片爽口,唔怪得咁多人為左呢片鴨血,慕名而來. 尾段店員送上免費的水蜜桃冰沙,又係好正,夠凍透心涼.而呢個飲品係可以免費加添一次,記得唔好miss. 無老鍋店員服務態度好好,唯一美中不足係呢度用餐時間得90分鐘,真係唔係幾夠,但店員都會善意提醒如果之後無booking既,其實都可以坐多陣既. 價錢方面,預左唔平,而且呢度收服務費,但因為整體質素太好,所以我都係會推介既. 點擊圖片放大 +28
