第一次放假，同同學仔老師一齊上山！ 第一次行山，心情當然開心，我地由專車車我地去到山下面可以比車入到嘅最高點，一齊落車步行上去。 好大嘅湖.... 唔知佢地叫咩名，不過感覺幾靚 我只係記得，行咗好多級好多級同好多級…見到好多馬騮… 不過馬騮唔好話香港大把，自己屋企都有幾隻，所以無咩感覺。 跟住又有好多級…見到好多牛... 佢地響樹下面乘涼，有D就落湖沖涼 都唔明D牛點解可以行到咁高 之後又好多好多級…見到有個山洞，入面有佛像嘅雕刻，回音好重，應該係冥想嘅好地方… 基中上我地係爬入個山洞，而唔係行入去。 唔知係幾耐之前做成嘅呢... 之後又好多好多…再好多好多級…就係一大片平地，我真係唔知，原來印度都會有咁靚嘅大草園，睇住好多好多黃色小花，我覺得自己響歐洲多D。 黃色小花嘅一片大地 我地坐咗一陣，但如終要趕路…又好多好多級…終於到達小廟宇，到達目的地喇！...我滿心歡喜咁唸...點知...原來只係中途站，我地休息咗一陣，影下相，又繼續向前行…應該係向上行至係，因為D石級每一級都差唔多我"失頭哥"咁高，再高少少，我真係要爬先上到去… 山脊已經有個好靚嘅小廟宇 終於…又好多好多級之後，見到佢，我就知道今次真係到達咗今日要去嘅馬騮神廟。 住在馬騮神廟的婆婆 呢度好高，呼吸到地面呼吸不到嘅清新空氣。廟面前坐咗個婆婆，我都唔知佢幾多歲，但我估佢應該過100歲了，佢響火堆中取火，嚴熱嘅印度 + 雖然已經10月份其實應該都仲好熱，但你唔會想像到山上有幾涷…婆婆用手勢示意我地入廟參拜，及用受過神惠嘅顏料點響額頭，意思可作保平安之用。小小嘅廟，老婆婆就住響廟旁邊嘅一個用禾草札成嘅營地，我真係唔知佢平日點生活，食D咩…上山都用咗我地大約4個鐘，佢平日嘅生活…我完全想像唔到。 婆婆夜晚都係訓呢度架喇！ 馬騮神廟 涷到大家都靠火取暖，山上真係夠涷！ 廟後面有個平地，行過平地之後，原來又係另一個世外桃源。我鐘意去旅行，呢個係其中一個原因 ~ 我可以親眼見到當時嘅場面。無論係平平無奇，壯觀極致，或是帶同感受，只有親歷其中，才能明白於固中。呢度唔係喜馬拉雅山，亦唔係咩世界數一數二嘅高山， 但眼前嘅闊景，足夠令我知道我真係仲有好多路未行，呢個世界真係好大，而我，真係真係好渺小。我好想用相機影底我企嘅位罝有幾高，見到嘅景有幾闊幾靚，但…只靠照片框框，又點可以呢… 框框之內，可以表達到幾多? fb: www.facebook.com/lifetoletgo blog: http://www.lifetoletgo.blogspot.hk
