「又去旅行？」 呢幾年，呢句說話我聽左超過100次。 一開始我都會解釋 ：「唔係，只係想襯後生又未有小朋友前去多啲姐~」 過多排，熟我既親友都會繼續串下我，不過對我黎講都只係一句開場白，所以都無乜所謂~ 但有啲人偏偏有以下誤解。 「又去旅行？你就好啦，唔洗供樓又唔洗養家，大把錢攞黎去旅行！」 我只係以一個微笑回答。 「唉，我都想好似你咁，無家庭負擔！家用又唔洗俾得多，成日去玩。係呢，你咁樣真係有排都買唔到樓！」 以前，我聽到後會好嬲，好唔明。 點解我成日去旅行就代表我無俾/俾得少家用？ 你又唔係我家人，你又知我俾得少？ 點先叫多？若果要俾人工一半以上先叫有俾家用，我一定係唔養家啦。 但點解一定要標籤人呢？ 以呢啲人既邏輯，若果佢供緊樓，我都可以咁話佢！ 「又供樓呀？你就好啦，唔去旅行又唔洗養家，大把錢攞去供樓啦！」 講得難聽啲，一個月供樓都要一萬蚊！我個個月去旅行都未必要用一萬... 咁點解你係乖，我係曳呢？ 我曳在去完旅行，我得到既只係經歷。 你乖在供左樓，你得到既係一個單位。 但人大左，我已經唔太在意。 我發現只要身邊最親既人知道我係點就得~ 我呢個80後無乜特別大既願望。 只係想成日去遊行、一家人齊齊整整就好滿足！ 信我，只要計劃好自己既人生。 儲錢買樓又好、環遊世界又好、自己做生意又好。 定下好目標，問心無愧，就唔好再理其他人既目光！向前衝！ Facebook : 80後的人妻「旅」友 邀稿 : wingring417@gmail.com / wingring@ymail.com
