如果未來的一天內，你唔再有手機跟身，你覺得未來的24小時會有乜感覺呢？基本上而家人人都有手機，我就因為工作需要每天拎3部手機出街，但講真句我分唔清啲提示聲囉，如果唔係為方便分開啲社交平台，實在好唔想拎太多，根本就兼顧唔晒。但以前有次坐的士，一上車簡直O晒咀，司機竟然有8部手機插喺度！佢沿途傾電話又語音，仲要睇路面情況；當時睇佢表演以1打8的時候，實在係佩服到一個點！以前2G年代，智能電話仲未出世，"ERIC仔"的舊款磚頭係沒有彩屏的，電話費以分鐘計算，而每分鐘都幾貴。當年手機唔算係必需品，有人覺得通街都能借電話，無必要買；有人就會認為通話費太高昂，唔捨得。買家多數只為緊急時可以即時撥號，係唔會不斷拎佢來煲電話粥的，所以同沒有手機跟身沒分別~~~咁當時係點過架呢？返服務性行業的，有空會睇雜誌吹水。返飲食的落場會訓覺，或者去機舖。返文職的其實都係對住部電腦，但網絡唔發達，可能玩得最多係接龍同地雷。返到屋企呢？同屋企人睇電視劇~同朋友坐公園吹水~同情人喪煲電話粥~再唔係就直接匿埋打遊戲機，無錯！係插紅白黃線的那些舊機，連手掣的那些舊款，打住機自HIGH！我相信當年337、388、398呢堆型號，應該用過的人都有印象吧？任跌任撞不特止，因為只係打出打入，佢的電池仲非常襟用~我仲曾經聽過388部機有另類用途：有人夜歸時遇到賊仔，佢情急之下拎部388扑對方個頭，結果佢力保財物不失，令對方滴血而逃~亦曾經見識過有人燒住錢來傾手機，本來佢仲懶懶閒，認為問題不大；點知見到張月結單就欲哭無淚囉，因為佢見到那痛到想自殺嘅總收費。不過後來先知道，有啲電訊公司係無明確說明計費方法的，唔知係班職員都未太清楚點計費，定係因為公司無特別指引，當時中招的人根本唔止一小撮。以前直接拎本書睇，近視加深得無咁光速。以前去機舖打大機，感覺緊張又爽又刺激。以前玩電視遊戲孖寶兄弟，可以低能地將佢爆機三次。以前無手機玩唔想溫書時都會拎住枝筆，不過係用來畫公仔或者寫啲嘢出來偷笑。以前做完嘢無聊就會用固網打比朋友，白痴無聊連是非都講完但死都唔收線。而家，有人問無咗手機可以點過？我只諗起，以前雖然無智能手機，但你會有其他嘢做，會搵其他消遣，其實，只係啲習慣隨時代改變了，事實上，以前的時間都唔係好難捱啫。**歡迎加Facebook或Instagram支持下隻港豬！！Facebook(小豬批雜貨)：https://www.facebook.com/PigPieSmallStore/Instagram(港豬無聊事)：https://www.instagram.com/pigpig.carcar/
