哈哈，我由細到大都係一個路盲，超級個隻﹗即便係自己住既社區，只要路線唔同，就可以蕩失路唔識返屋企﹗讀小學時還好，學校離屋企比較近，總之每日依照既有路線返學放學放就是了，反正唔會四圍走，蕩失路既機會比較少﹗﹗

之不過，到上左中學，雖然都叫同區，但就要轉幾次電梯，行大概十五分鐘先返到學，變數大左，於是，蕩失路既機會就時有發生﹗有時放學同學叫陪佢地去買尐野，買完之後就死梗，同學雖然會話我知點行點行，但結果都依然係蕩失路收場﹗要不就直接行返學校，然後就按照既有路線返家﹗唉，到底點解會咁，到底阿媽生少左尐咩比我﹗﹗

到大個左情況當然係繼續啦，到底有幾白痴哩﹗例如，係旺角，我識由地鐵站去朗豪坊，我又識由地鐵站去波鞋街，但假如叫我係路面行過去哩，咁就實出事，分分鐘玩大半個鐘都未搵到路﹗向朋友解釋左好多次，大家當然只係覺得，有無咁白痴呀﹗什至，假如係一間大少少既餐廳食飯，席間要去廁所，我係可以唔識路返位既﹗﹗

唔知係好彩定唔好彩，我身邊有一位人肉GPS，係未有GOOGLE MAP之前，要去陌生地方，一係就係佢預早帶我行幾次，要不就親身帶埋我去﹗雖說依家有GOOGLE MAP，好多時都係行左好遠錯既方向，先定到位知道點行﹗

不過人無完美，我哩位人肉GPS雖然有超凡既辨別方向既能力，之但係，佢係面盲既﹗﹗個個人明明見過幾次，但佢都依然可以唔認得﹗什至係住係同層既鄰居，好多時出出入入都會遇到，但假如係街見到，佢係唔會認得原來個個人係鄰居泥﹗﹗去旅行時，問題就更加大啦﹗哈哈，係路上遇到新朋友，有傾過計，食過飯，但只要佢自己一個再遇到哩位新朋友，除非對方主動打招呼，要不佢係唔會發現哩個人係同佢食過飯既﹗

有時都幾好笑架，年輕時代，試過係街上遇到野蠻家長同小朋友，認過忍唔住出聲話幾句（當時仲未有具拍攝功能既手提電話，唔使驚上YOUTUBE），佢個頭鬧完人，轉個彎再見到，佢又完全唔記得自己係同人地發生過口角既，死未﹗﹗

話說，尋晚自己一個去左個生平未去過既地方 - 秀茂坪，出發前無搵路，因為約左識路（我以為）既朋友一齊去﹗哈，點知，臨落車，個個朋友先話我知，原來佢係路盲，經常迷路﹗好多時都落錯車﹗當佢表示得尷尷尬尬既時候，我就滿心歡喜話佢知，哈哈，唔使驚，我同你一樣，我完全理解你既苦惱﹗﹗

跟住，又係聚會度識左另一個女仔，佢對於路盲朋友表示無法理解，於是，我就即時反問佢，你既方向感係咪好強架﹗答案當然係啦﹗於是再問：咁，你係咪唔係好認到人架﹗佢當時既反應好驚訝，問我點知，哈哈，我點會唔知喎，我同一個面盲既GPS生活左咁多年﹗﹗

每個人總有佢既強項，只係~~我既弱比別人多﹗

每個人係生活上都會遇到障礙，問題只在於別人是否能量解

成功發佈