話說，上周五晚約左班朋友食飯，各人工作地點都係港島區，順利成章揀左間係銅鑼灣既餐廳﹗﹗餐廳位置唔算就腳，係加路連山道，姐係丹麥餅店附近，可能正因地點唔算便捷，餐廳並未有用餐時間限制，唔使食完飯急急腳交檯﹗哈，約朋友食飯，食物質素當然要考慮，但是否可以不受時間限制，可同朋友舒舒服服咁食餐飯，傾個夠先係我揀餐廳既首要條件﹗ 我當然明白，香港舖租貴，站係餐廳營運者既角度，一晚只做一轉生意當然會影響餐廳生計，但站係客人立場，約朋友聚會，要限時限刻越交檯，實在係掃興﹗﹗ 未入餐廳，已被門外的畫吸引 餐廳佈置帶點旅遊氣氛，挺舒適的耶 似乎WIFI對食客都幾重要 到訪當晚，餐廳三部冷氣壞左兩部，要出動風扇幫忙 晚市有套餐，價錢合理 豬手肉質夠嫩滑，可惜皮唔夠酥脆，評價一般 羊架不錯，我地四個人，啱啱夠分 牛我地要左MEDIUM RARE，廚師處理得不錯，只是，牛肉本身質素一般 最讚係個三文魚，好滑 之但係，我相信一般做開聚會搞手既人，都不難明白，掃興既事，往往係係聚會發生之前出現既﹗﹗ 一班朋友，總會有一個人，耐唔使就忍唔住出聲約食飯，而朋友群當中，哩個R飯食既人一般都係我﹗﹗其實絕對係自己犯賤，唔係特別得閒，唔係特別鍾意食，只係。。。在意每一班朋友，耐無見就會想聚下﹗依家有左WHATSAPP其實已經叫做方便好多，起碼可以一班朋友開一個群組，咁，每隔一段時間，見個GROUP靜，就會口痕開聲問，不如約食個飯吖﹗﹗ 咁，通常都總會有一兩個人撲出泥答你，好喎，無問題呀之類，不過到你問期，就會出現一連串的問題。其實，朋友間聚會搞手既苦況，早就有人係網路上寫過﹗做搞手既，睇完都會紛紛點頭，只係，點頭過後，卻沒有換來朋友們既體諒同支持，情況都依然會繼續﹗ 問心，做搞手，查實都真係會幾氣餒，大家都總會試過，不停就期、安排餐廳作出建議，但就未能得到各方的體諒或遷就，總有一大堆投訴同不滿﹗每次都好似自己無事搵事泥做咁，最激氣既係，當你唔搞，又會有人投訴你唔安排﹗ 每次約期，都總會有人答你，好吖，邊日吖，我就你，但到你例舉日子以供選擇，就總會有人會答你，哩日唔得，個日唔得﹗咁，不如你比個期泥吖，佢又會答，唔緊要啦，你地約啦，我就大家﹗咁你姐係想點姐~~~ 揀餐廳當然亦會遇到同樣情況啦，我咩都食架，但到你揀左一堆餐廳，就梗會有人答你，哩間唔好食，唔好坐，唔就腳，諸如此類諸如此類﹗你有無好餐廳提議呀，我咩都食架，你地揀啦﹗ 哩尐苦惱，搞手們個個都遇過﹗我有試過語帶委屈咁係群組投訴，每次約食飯，我都好似係度R飯食咁，實在係自討苦吃，然後有朋友會走出泥話，我都想約呀，大個夾個時間吖﹗跟住﹖﹖跟住咪就係，又靜哂囉﹗ 好似今次約食飯，群組查實得五個人，但有一個人從來都唔出聲既，知佢有讀到訊息架，知佢在線架，總之就唔係忙到無時間個種，但成個約食飯過程，佢就一句都無覆過你，再覆實時間地點個陣，都包底講多句，阿邊個邊個，我訂檯有預你架，到時得閒就泥，咁架啦﹗但佢依然唔會答一句話，我個日唔得呀，你地食啦﹗其實。。。我唔介意你退出群組架﹗﹗ 又，有尐朋友不停會話叫你約食飯，但你每次約期佢都會話好忙﹗有尐真係想約既，佢忙完一般都會自動投案話，我忙完啦，不如邊日邊日食飯啦﹗遇到哩尐朋友，我一般都會盡量就，每個人都有自己日程，各有各忙，未必能經常見面，我當然懂，所以當對方自動投案，其他人都會盡量配合﹗ 之但係，有尐人，佢不停叫你約，但又唔肯比期你，你叫佢忙完搵你，又從來都唔會有下聞﹗作為一個搞手，真心氣餒，搞手真係唔係無事搵事做架，搞手一心只係想維持朋友間既聯系，每次做完都知呻笨架，只係，隔一段時間又會掛住大家，於是又唔知死咁又再搵自己泥搞﹗ 朋友間，總有一尐你唔搵佢，佢一世都會主動搵你既朋友，其實大家感情/關係良好架喎，就只係哩種人唔鍾意主動聯絡﹗唔鍾意主動唔緊要，只要你唔好耐唔使彈出泥話無人搵你就得架啦﹗再者，你唔習慣主動搵人，查實其他人都唔習慣架，咁，就大家一齊唔好搵囉﹗你忙唔緊要，你忙完比個期出泥就得架啦，你明白其實其他朋友都各有各忙就得架啦﹗ 做搞手，真係要好大氣量，要唔介意無人支持，無人體諒，要唔好介意全部人都覺得你唔做係你既錯﹗仲要好無記憶，係安排期間遇到的激氣事，聚會完就忘得一乾二淨，先可以下次又唔識死再搞過﹗﹗ 搞手，都不過是天生犯賤的一個人﹗﹗其實，搞手都好易氹，只要，你比少少反應以作支持，佢地就又會繼續搞下去架啦﹗﹗
