唔知你地係咪由一開始就知道比薩斜塔同巴黎鐵塔係兩個建築物泥既哩﹗哈哈，白痴又無地理常識既我，細個時（我估應該係中學前）一直都以為比薩斜塔姐係巴黎鐵塔，直到真係睇到相先開始識分，真係失禮哂﹗﹗

又，以為世界既斜塔只有PISA個一個，但今次去完薄餅國返泥，就發現係威尼斯外島仲有一個都好斜下既﹗如果計人為的話，我地係布拉格亦有見過另一個。唔知，世界查實有幾多個斜塔既哩﹗﹗

Dancing House, Prague
taken in 2014

諗返起，原來人生第一個睇傾斜既建築物，唔係意大利既比薩斜塔，而係捷克既布拉格既DANCING HOUSE。當然，哩座建築物係人為地斜，佢既外形真係幾特別架（話係一男一女跳舞既形態，似唔似﹖），去布拉格，不妨去望下﹗查實哩度唔係什麼名勝景點，但當年出發前無意中睇到一張相，於是又慕名親身去望一眼﹗﹗哩座大廈係一個好出名既美國建築師FRANK GEHRY所建既，佢係一個好想打破傳統既建築師，所以佢大部份既作品都係比較特別既。我地後尾去德國都有再去睇過另外一座佢既作品，哈，查實。。。香港都有佢既作品，應該唔難搵到，有興趣不妨上網查下﹗﹗

比薩斜塔，應該都熟口熟面了吧

比薩斜塔應該大家都識啦掛，咁出名﹗不過尾站去到威尼斯，無意中發現佢既外島都有一座，而且都幾斜架，點解無聽人提起既哩﹗﹖還是，只係我地井底蛙唔識哩﹗﹖

San Martino, Burano

哩一座係係威尼斯外島BURANO所見既教堂鐘樓，最初睇到既時候我都有懷疑係咪自己睇錯，不如換個角度再望多眼﹗

San Martino, Burano
哩個角度比較明顯

哩座天主教堂同鐘樓應該係16世紀已建成，似乎都係地面沈降而做成傾斜﹗查實我係威尼斯本島仲見到一座架，但我搵唔返佢到底叫咩名，上網搵斜塔資料又搵極搵唔到一座類似，所以又唔敢確定佢係咪真係斜既﹗

係威尼斯本島見到另一座感覺有點傾斜既塔樓

不過就咁，當你上網搵LEANING TOWER IN ITALY的話，你會發現起碼有十座﹗單單PISA就有三座，而威尼斯本島亦有三座﹗有機會去的話，不妨又睇下會唔會遇到吖﹗﹗

相關閱讀：薄餅國住宿 - La Spezia

成功發佈