一路都無法完成，到底去旅行買唔買通行票既迷思﹗到底幾時應該買PASS，幾時唔使哩﹖我估哩個係大部份旅者既苦惱﹗本來好想整理一下資料，但寫極都寫唔完，好似越寫越離題萬丈，都係等下先﹗ 面書好多朋友都將個人照片變左黑色，原因大概不必說明﹗的確，7月14號，感覺係黑色星期五一樣，唔想去接受所發生既事﹗﹗ 哩幾日都忙緊溫習手語同做練習，真係好倦﹗平時上其他堂，你都仲可以邊聽邊抄寫，扮寫下NOTES，可以分下神邊聽邊玩下電話，但手語，老師同學全程係在比手，你稍一分神，就會錯過，就會睇漏。但又無可能全單靠記憶將課堂上既野充充記住，於是，返屋企就要花時間再睇再練習。依家仲要加埋法律同醫療既專有名詞，確實，真係越來越難行﹗ 讀其他科，遇到疑難，上網搵答案，去圖書館搵書，資料不乏，比較容易自己再鑽研，但手語真係無﹗首先唔會有書/字典清楚例明每個字彙點比手（其實應該係有，只係唔算多），又，同一句句字，其實唔同聾人既表達方法已經唔一樣，無MODEL ANSWER，無固有答案，於是，有時習慣左有範例可跟既死板學生如我，就有點無所適從﹗ 哈，突然諗起，最近網上有一條短片，講一個香現港女生同一個外國男生比併英文，大家一同答DSE的題目，睇下邊估高分，結果，香港女生完全知道香港讀書既遊戲規則，使出完美既答題技巧，於是力壓外國男生﹗當然，無人話外國人既英文一定比較好，之但係，比併結果，只係証明左個女仔識點玩個遊戲，並不代表佢英文比較好﹗ 香港就係咁，唔使要認真思考，識跟識玩就係嬴家﹗﹗ 聽聞，手語翻譯既遊戲規則都差唔多，其實你未必要打出一套聾人睇得明白既手語，而係需要打出一套，聽人覺得你啱，覺得你合理既字彙手勢就可以﹗﹗咁。。。查實，我地學翻譯，係為左同聾人溝通，定係同聽人交待既哩﹖﹗ 現代人既遊戲規則，思考模式其實真係好有趣﹗
