小時候，對"老師"總有一個迷思，覺得老師都係學者，都係學識淵博，無所不知，無所不曉﹗

人大左，當然明白，老師都只不過係人，不過，就依然執著，老師應該有一定修養，有一定既學問，所以，老是不願意站在教師席，怕失禮，怕見笑，總覺得自己學問未夠深厚，見識不夠廣博，寧願選擇當副手，當義工，感覺壓力沒那麼大，責任沒那麼重﹗

一路走來，又會發現，若不是站在教師席，有些事一世都不會懂﹗若不是站在教師席，學生提問，自己未必會站在別的角度思考﹗有時候，正因為學生提問，你需要去解答，你才會再深入思考箇中道理；正因為學生換了另一層面提問，才會幫助老師懂得換個角度看，換個角度解釋﹗﹗原來，教學相長的道理實在不淺﹗﹗

以練習瑜伽為例，因為每個人體格不一樣，假如，只是自己埋首練習，你大概一世都不能想像，原來，某些動作，某些體位，對別人來說是具備不一樣的意義﹗自己習慣了獨自練習，於是，或者會忘卻了體位的本義；獨自埋首苦練，人就會容易忽略基楚的重要，而只去追求動作的完美和流暢﹗﹗

多得不同學員，身體上的限制，身體上的獨特，而需要個別的去思考該怎樣幫忙她們把動作重新調整、改良，或進行變奏去讓她們更容易掌握動作﹗

最近，無意中遇到兩個很資深的導師﹗其中一個，確實叫人佩服得五體投地，再高難度的動作也難不了她，每個體位動作都能完美展現，她對瑜伽的熱誠，對瑜伽所付出的時間，實在讓人拜服﹗﹗可惜，有時會做並不代表會教，她的鍛鍊過程，都是自己苦心經營得來，經歷過痛楚，傷患，於是，打從心底覺得，你要達到她的水平，也非得同樣經歷過苦練和受傷﹗可惜，她卻沒注意到每個人的體格、體力什至感受都不一樣，於是，在教學過程，她只會說，你做啦、做啦，上課期間，只會說，哩邊多尐，轉哩邊多尐﹗ERR...老師，姐係邊邊哩請問﹖到底應該係那組肌肉在運作，到底該是用力還是放鬆，還互相伸展﹖力點在那﹖平衡點在那﹖﹖假若，你本身有點基礎，還勉強可以應付，但假若是初學者，想必對哩邊哩邊，個邊個邊而感到無所適從﹗

又，最近有另一朋友話想做運動，網上有說20蚊兩小時上一課瑜伽，唔知真定假，又陪下佢上堂﹗詳情唔講，怕得罪人﹗其實非常推崇類似活動，平平地，等附近街坊可以一齊做下運動，伸展拉筋﹗老實講，依家網上好多好多幾分鐘既健體運動，話可以迅速修身，點解會咁多﹖皆因一般人都有惰性，要自己的起心肝做運動確實係有尐難﹗放工返屋企想放空休息，好少會無端端自發做運動，要不，都唔會有咁多話可唔使郁又可減到肥既產品推出市面﹗所以，哩類平平地，又有人帶住你做運動既安排，其實真係唔錯﹗

我估，我只能程個位為一個示範員，佢只係做出一連串動作，然後活動室入面廿幾人就有樣學樣做，依然個句，廿蚊，真心抵，而佢，又的確係做緊一連串既瑜伽動作，之但係，例如坐立式前攀，佢既指令係：坐係地，雙腳伸正，然後雙手向前伸捉腳指﹗如果齋聽指令，手長既人就實有著數，佢只係話手要掂到腳指，於是，有人會死命伸長雙手，什至會用頸力想盡量伸前一點﹗但實情哩個動作，係想伸展後腰同大腿後方既肌肉，你係咁教人伸手做咩哩﹖唔，再一次，20蚊一齊去做運動，你想點﹗係，真係但求比平時真係完全唔郁既人活動一下，但正正係因為平日無做開伸展，咁樣~~~係好容易會令參加者拉傷﹗雖然收20蚊，唔係話求其你地郁下就算，你都比返少少心機去解釋個動作應該點做，假如你未做到，其實可以考慮另一個動作之類咁哩﹗﹖又，開始前，佢唔會問在場人有人咩傷患病痛，會唔會有尐動作唔適合咁尐人做既哩﹗有無咩要小心哩﹗20蚊，都要對每個參加者負責架﹗﹗

以頭先哩個動作為例，其實可以試下坐左係地下，雙腳微微張開至肩膊既闊度，雙腳屈曲，先將肚腹貼近大腿，但要保持背部完全挺直（如果真係貼唔埋伸唔直，可考慮放厚毛巾係肚腹同大腿之間既空位，咁就可以盡量貼近而又做到背直效果），然後先慢慢伸直雙腳（可考慮放小毛巾什至瑜伽磚係腳根位置，咁會容易尐借力推/伸直對腳），最初做，大部份人都伸唔直對腳架，唔緊要架，我地只係想拉扯後背/下腰背，同大腿後方既筋鍵，咁樣維持一陣就可以﹗

但個位中年既"老師"，就一味只係叫伸啦伸啦，伸你個頭呀真係﹗﹗照估計，哩位老師係好早年就學瑜伽既，但就只學動作，沒有理解動作背後的意義，於是，只係模仿形式，於是，亦只懂叫學員模仿，完完全全係以訛傳訛既典範﹗﹗

反之，我認識一位年輕朋友，二十出頭，因自少習武，現在身在德國，邊讀書邊教授武術以賺取生活費﹗要教已不易，仲要用另一種語言，堅﹗﹗同佢傾計期間，理解佢當年自己學，都只係師叫做就做，但依家要教人，於是就花心思諗出一個有系統又科學化既教授方式﹗德國人講求科學，所以假如你話，你做啦你做啦，係無人會啋你同跟你學架囉﹗

咁點哩，例如，中國武術好多時攻擊都會踏地，原理係咩哩﹖其實係後助力，係借踏地力而加強攻勢，但以前既老師傅未必講得出，反而，哩個小妹妹會分析會描繪，讓學員有據可依﹗﹗

教學相長，談何容易﹗﹗

成功發佈