由羅馬到拿波里，大概係一個鐘火車，我地遲買車票，見普通位同商務位只差十幾歐羅，於是就買左商務位，無錢搭飛機既商務客位，喺有坐住火車既商務客位先啦，的確係一分錢一分貨。 無錢坐商務機位，唯有坐住商務火車卡先 去拿波里，主要為左去龐貝古城。本來有個選擇，就係係羅馬Join local tour，一早有車係羅馬接送過龐貝，仲有英語嚮導，一來都幾貴，二來有人為食，想食個個那波里好出名既Pizza，於是選擇早一日離開羅馬，直接搭火車去拿波里留宿一晚，其實有少少後悔，此舉令到羅馬行程壓縮左，影相人又貪心啦，想影均每個角落，每個景點都會留好耐，始終體力有限，於是只好放棄某些景點。 原定計劃係兩點多去到那波里，放好行履就去海岸線附近既城堡睇下，不過係羅馬個三日真係行到虛脫，掙扎左一輪，決定保留體力漫遊龐貝，而到達拿波里當天就只係火車站附近行下同食個Pizza就算。 五點鐘已到傳說中既神級薄餅店，門外已經好多人等緊，真心倦，不如買外賣返酒店食。 果然係神級薄餅店，五點鐘門外已經企滿人 入到店內，同收銀（我估係店主掛）示意我想買外賣，我完全明白意大利人係慢既民族，所以我都只係企係度等指示先話佢知我要咩，但個位哥哥已經滿有不悅話佢好忙，叫我咪嘈。我咩都無做喎大哥，Okok，我都明客又多，得佢一個落單會燥底，我只繼續面路笑容唔出聲等。 等左陣，終於落左單買左兩個薄餅外賣，查實佢得兩款pizza，一款有芝士，一款無，所以賣哂兩款試，接過張單，阿哥哥已經不耐煩咁打發我去門外。當時我出已經奇怪，張單無號碼無指示，你咁勁認到邊個客賣左咩？但阿哥哥頭也不回就行開左無理我，咁唯有等啦！ 等左十分鐘左右覺得唔對路，佢地既pizza出爐好快架喎，再企左陣我見到有位男仕拎住外賣盒係店內行出泥，依，唔通要自己入去攞既？當時有另一位係澳洲泥既女遊客應該都有同樣疑惑，比我早左一步入店內查問，見到店員係佢張單度撕左一下，示意叫佢係店內等。 點呀喂，原來要係入面等，唯有又入返去問啦，個位收銀大哥就已經破口大罵，話叫左我去爐前面比單店員喎，大哥，你幾時有同我講過野呀？！唉，我唔識講意大利文，無得駁咀，而且我只但求有野食，我忍。佢地舖面好細，兩個客企係入面等其實好阻住其他客人同服務員，但我唔想架，我被迫架咋。 又等左五分鐘，睇住佢地不停送餐比店內客人，但都未到我地兩個外賣客，另外個客識意大利文，問左廚房兩句（店內真係好細，開放式廚放，直接見到入面運作），廚師依然無理。後來多左兩三個人入泥買外賣，店內有人滿之患，廚師先開始問服務員有咩order。 問完之後先開始見店員準備外賣盒，我同最初入去個個女仔相視而笑，用英文交談左幾句，佢拎完外賣就同我講，應該下盒就係你架啦，臨走前仲掉下一句good luck。跟住再等左幾分鐘，終於到我啦！太感動啦！ 店內情況 其實得一個師傅負責整，一個負責放入爐，一個負責做傳遞，另一個負責上碟 單憑哩張單基本無咩可能知道係邊個叫左尐咩既 我唔係投訴店長服務態度差或什麼，好理解意大利人就係咁，佢地唔係唔友善，但總之就係咁。再者客多，又大部份都係遊客，有時都未必想亦無時間多講。但比我先入店內等個個女仔識意大利文既，都誤會出左門口等左陣先入店問，都比老闆鬧，其實說話當中有意無意間好似話你班遊客蠢，叫你又唔聽咁。我買外賣姐，買完就走，無須動氣或介懷，又無需作出任何反駁，香港既澳牛呀，維記呀都係咁架啦，叔叔們忙呀嘛，純粹平衡心態，隨得佢啦！ 如果有機會去，你一係就乖乖等下位係店內食，咁就唔怕誤會啦！如果真係買外賣，記住係付款後，拎張單比店員話佢知你要咩，然後企係店內等啦！ 佢地既薄餅的確好食既，餅底好煙靭好軟熟，有爐火既香味，兩個人買一normal size其實已夠夠，只係我地想試哂兩個味先叫兩個，normal size只4歐，抵食吖，難怪咁多人慕名而來。 上一篇：驚險羅馬（下）
