18號凌晨先由大阪返到香港,今晚又要準備出發去意大利啦﹗唔係公幹,只係自己旅行,身邊朋友個個都話過份,更有朋友今朝話,有錢就是任性﹗唔,我無返駁,的確,今次兩個旅程的確太近,連自己都未回得切氣,但係大叔影到櫻花既喜悅,就讓我任性一次吧﹗ 再者,我地每次都只係遊覽,無咩大錢要洗,完全同有錢扯唔上關係啦﹗不過,原來人老左真係會改變,以前我一定會搵一大堆道理出泥但求要說服朋友,但依家,唔緊要啦,反正我講完唔會改變到別人既想法,自己知就可以了﹗﹗ 正因為啱啱返泥,旅行所需物品基本都係個篋度,無咩特別野要執,最多只係加返個旅行用既電水煲,老人家嘛,想飲熱水,歐洲住宿未必有,自己帶定穩陣(詳見歐遊的二三事) 部NOTEBOOK個KEYBOARD壞壞地,本來都掙扎不如拎少尐唔好帶去,之但係部RICOH THETA S要用電腦先可以叉電 (獵櫻失魂事件簿),姐係點都要拎﹗ 說明書寫明,哩部野一定要用電腦叉電 本來諗住去到羅馬機場先去搵TIM既電話卡,但早前朋友去西班牙,陪佢去買電話咭時老闆搵介左張UK 3既電話咭,見到抵用,又買泥試下﹗ Three UK既電話咭,1GB承惠HKD138 哈哈,我既強迫症好似越來越嚴重,係日本留左四晚,我都係有洗過衫架其實,本來都諗住返到泥先算,但Airbnb有浴室寶嘛,浴室又夠大,可以掛哂尐衫係度乾衣,加上大叔大汗,始終都係覺得洗乾淨開心尐,所以係大阪返泥我地只得大套污糟衫要洗﹗ 去意大利16日,我既性格就更加會洗啦﹗早排無聊行過無印,見到個旅行用既洗衫板,貪得意買左,睇下有無用先﹗﹗其實沿途係會住AIRBNB架,應該有洗衣機,反正輕巧,帶左先算﹗ 我估我真係好鍾意洗衫,早排去無印買左個旅行用既洗衫板 不妨都帶定一兩個密室袋,以備不時之需 一切準備就緒,今晚就要出發嚕﹗ 延伸閱讀: 旅行隨身物 旅遊的印記