今次既關西獵櫻準備有點倉猝，又沿路都改行程，失魂既事比較多﹗ 低能仔事件一 出發前除左買左支新鏡，仲買左RICHO部全景相機諗住可以拍低櫻花盛況，到地當天係背割場玩到無電。之前朋友部LG係可以用尿袋叉架嘛，咪又試下囉，點解無反應既。。。？唔係咁就壞左呀嘛，搞左一輪，終於記起，出發前明明係睇左說明書，知道部野係建議用電腦叉電，點知我居然唔記得帶電腦﹗說明書寫明叫你一定要用佢條USB線，但唔建議你用其他插頭，只可用電腦叉﹗佢有話生果公司產品既插頭或許可使用，但假如因此造成電池損毀概不負責﹗一場去到，無得叉電，吹漲﹗查實我有企圖過用其他插頭去叉架，但佢完全無反應，我幾驚佢就咁就壞左，好彩返到香港用返電腦叉又無野﹗唉。。。天才真係無藥醫的。。。 出發前特意買左個RICOH既360 CAM諗住影壯麗既櫻花 出發前仲買左新一代既16-35mm，舊個支都未得閒放 低能仔事件二 話說行程第二日我地一早去左大阪造幣局，未出發時仲話好似無咩睇咁，點知去到就唔捨得走，佢種類好多，沿途又多人，所以逗留時間長左﹗下午按計劃搭車去兵庫縣既姬路城。唉，唔熟書姐係唔熟書，搭搭下突然記起，參觀時間好似只到4點，但發現時已經上左車，預計到達時間係3點45分。 個心真係跌左出泥，我有諗過不如算，唔好出閘，真接回頭，但坐左咁遠車過泥，又人又唔心熄，結果？兩個低能仔一出車站就跋足狂奔，孭住背囊，又相機咁起勢係咁跑，我睇返地圖，車站離姬路城約1.8km，我地用左5夠10分鐘既時間到達現場，阿扯。。。要入城參觀先有時限，係城外邊睇係唔使畀錢，亦無時限的囉。自己都忍唔住笑，低能到一個點。。。 日本國寶之一，姬路城 跑到身水身汗，既然無時間管制，咁梗係坐返陣先啦。突然有個講普通話既女人走過泥話做問倦調查，想問對兵庫縣的感覺，我答，我啱啱泥咋喎。其實心有保留，佢又唔係著制服，唔知係貴寶號既哩﹖當時又熱又倦，反正佢無傷害性，又當坐係度吹下水抖下咁，佢問既問題，十居其九我都係答唔到既，閒談間知佢本身係台灣人，嫁左過泥日本廿年，休息夠，我就推卻話要去影相走左﹗其實全程佢都相當友善架，問既問題亦只係一般對遊客既調查，想知遊客對兵庫縣既印象﹗係佢個表度我見到甲子園，先猛然記起，係喎，甲子園係係兵庫縣架喎，跟住回程就咁啱見到去完甲子園睇棒球賽既球迷。 原來日本人真係好熱衷甲子園，球寒期間有特別安排 低能仔事件三 話說要幫朋友買藥，於是係心齋橋附近求其搵左間藥房買齊朋友拜託既野就去排隊比錢，見到店內其他人既掃貨情況都咪話唔得人驚，全部人都好似準備饑荒之類，大災難前想囤積物品既情況，只係，囤既唔係糧食，而係藥妝﹗﹗排左一輪隊，終於到櫃台，幫忙結帳既女生不停係度打呵欠，我不禁微笑，對住個女仔講，辛苦你啦﹗個女仔望一望我，然後開始交談﹗ 其實我買左唔夠一萬日元既藥，應該好快搞掂，但因為一句辛苦你啦而打開話題，個女仔過泥讀書兩年，半功讀的生活實在不容易。佢知我係香港港，突然問我有無睇過<驢得水>哩部電影，說要推介，然後又講起<活著>，估唔到排隊買野會傾起電影﹗ 咁低能仔事件係咩﹖哈，就係兩個女既掛住傾，差尐執漏野囉，熟行程既都知日藥藥妝，如果要免稅就要入袋嘛，兩個人傾傾計入少左幾樣貨，比哂錢差尐諗住行人，好彩大叔精明，問，枱面既貨係咪我地架﹗哈哈，有偈傾就失哂魂﹗﹗ 相關閱讀： 關西獵櫻 - 住宿篇 獵櫻辛酸史（上） 獵櫻辛酸史（下） 甲子園 賞櫻準備中 賞櫻。想櫻 旅行隨身物
