今日就要飛大阪，執執下行履突然覺得唔舒服，食左藥都係咁不停咁流鼻水同打乞嚏，要快尐訓返陣先得啦﹗ 之前都有提過，對我泥講，執行履比起計劃行程容易﹗我一向主張簡約，出門行裝亦當然亦以輕便為主﹗不過，除左敏感藥、頭痛藥，大叔上機一定要有既眼罩同埋吹氣頸枕，仲有尐隨身物品野不可或缺，所以係訓之前要拎左先﹗（哈，查實我係咪已經寫過類似既野既哩﹖﹗我好似有少少印象，但頭好痛唔想搵，務求打完就去訓一陣﹗） 1) 指甲鉗 - 我有MIT手指既習慣，以前一溫書/開會，就係會咁MIT手皮，有時開完會發現一枱都係，都幾尷尬架﹗近年用左一隻類似凡士林既野比較少左，但習慣係唔會改既，有時真係會MIT損手，所以指甲鉗對我泥講係隨身物品，不過為左可以上機，就要搵尐可以上到機既﹗ 改唔到MIT手既壞習慣，有時要出動指甲鉗去避免流血 2) 液體膠布 - 正正就係因為成日會MIT損手，以前有試過帶普通膠布，但膠布袋袋下就會變到一條鹹菜咁，所以後來轉用左液態膠布，方便企理﹗ 普通膠布放係袋耐左會爛，液態膠布就方便多了 3) 我自己稱之為豬油膏既護膚品 - 其實有報告話左，哩隻野並不是傳說中那麼神，歸根究底都只係凡士林類既石油副產品，但對於我哩個MIT手怪，哩指野真係幫唔少忙，想MIT手主要原因係覺得指甲邊有乾皮，佢油份比較高，可以減少麻煩﹗ 油份較高既護膚品，搽咀搽手都得，一枝走天涯 4) 去污筆 - 大叔鍾意著淺色衫，之但係唔知咩解，咁大個人食親野都整污糟衫，查實應該係考慮買條圍裙比佢好過用去污筆既，但係我未買到之前，去污筆點都要跟身﹗ 好方便既去污筆 5) 眉鉗 - 好怪，我去親旅行，眉毛生得特別快既咁，本身已經係小虎眉架啦，如果加埋個堆雜毛，實在有點有礙觀瞻啦﹗ 6) 電筒- 其實又係平時既隨身物，因為兩條友鍾意失驚無神影星，雖然依家手提電話都有電筒功能，但小電筒開得比較快。其實電筒仲有個好處架，就係搵野﹗有無試過唔小心跌左野落地/地氈，但搵極都搵唔到﹖根據我睇CSI既經驗，電筒搵係會快尐既﹗﹗ 7) 牙簽 - 去日本好尐，但去外國的話，點都要帶幾枝牙簽旁下身﹗ 8) 保溫壼 - 保溫壼唔一定係放暖水既，凍水都都﹗大叔鍾意飲凍野，假如天氣熱的話，放點冰入去，就可以保冷一整天，唔使周街搵野飲﹗ 仲有無哩﹖呀，筆呀﹗我每個旅程都總有一本小記事簿，預先寫低搭車資料或需注意事項等，沿途總有修改，所以要筆﹗我有個怪習慣，就係鍾意係酒店拎人地既筆，一般酒店既筆都好好寫架﹗﹗有筆，當然唔小得寄明信片既地址LABEL，一般出發前都會寫定要寄明信片既朋友既地址係LABEL紙上面，咁，邊個寄左邊個未記，就唔會搞錯啦﹗﹗ 我有個怪習慣，好鍾意係酒店拎人地既筆，因為大部份酒店既筆都好好寫 應該齊啦掛，真係要訓返陣先，要不唔舒服仲要凌晨機，病左就麻煩了﹗﹗ 延伸閱讀： 旅遊的印記 關西獵櫻 - 住宿篇 獵櫻辛酸史（上） 獵櫻辛酸史（下） 甲子園 賞櫻準備中 賞櫻。想櫻
