又係一個忙碌既周末，天寒地凍，落雨濕濕，要一早離開暖笠笠既被窩，仲要山長水遠走到沙田，真係百般滋味在心頭，好鬼凍囉﹗﹗ 本來今日係出席義工嘉許禮，但我比其他人早左個幾鐘到達會場，因為我唔止以受嘉許者身份出現，而依然係以義工身份出現，幫手SET場﹗有朋友問，依，係機構官網既相唔見你既，係呀，我無上台領奬，無大合照，無等聚餐開始我就提前離開，去出席另一個義工活動﹗真心只係諗住幫手﹗或者，我始鍾比較鍾意做穩形人﹗ 相比係獎狀，我比較鍾意職員新手寫既感謝咭 已經連經第二年參加哩個機構既義工活動，期間我無認真出席過佢地既正式聯誼活動。好似做有機耕種一樣，每次需要義工幫忙，無論做跑腿好，做充籌好，我都樂於參與，但如果要亮相，都係避之則吉。原來，我比較喜歡做幕後﹗ 如同係舊公司一樣，做左十年，但從來都唔出席各類型既公司聚會，部門聚餐，公司周年晚宴，員工旅行之類之類，十年來我應該只出現過兩三次﹗ 最初入行既時候，前輩已經提點，食晏盡量唔好係好公司附近食，無論係邊度，都唔好開名講任何人既是非。有見同事太多，你無可能知道坐你隔離左右既人會唔會係同事﹗正所謂好事不出門，是非八掛哩家野，只要離開你把口，就會不受控地滿天飛，唔想做是非人，就盡量避談公事﹗ 本來已經寡言既我，面對一個八百幾人既八掛世界更加敬而遠之，同事們都知我係穩形人，私底下同好多同事都有私交，不過要出席大型活動就周身唔自在﹗早前同舊老闆食飯先傾返，我係另一一個NON FEE EARNER夠膽推佢開會既人﹗個陣每次佢EMAIL泥話想約我開會傾客戶既野，但我既反應，只會幫佢準備好哂佢名下客戶的現在狀況，然後用公司既內送服務送返份報告比佢﹗﹗佢什至用半帶開玩笑既語氣走去問我個財務總監，到底阿邊個仲係咪公司做，點解佢從來都唔同我開會﹗哈哈，跟住財務總監會走泥同我講，你得閒好去現下身，然後﹖﹗我梗係繼續扮唔知啦﹗其實我唔止係對佢係咁，基本上公司既其他律師搵我，我都會盡量以電話/電郵去處理，無必要最好唔好要我離開我個位，只係，我同佢老人家比較熟，先咁夠膽完全唔理佢﹗﹗ 記得臨離職前，向平日素有交情既同事交待離職準備後，各人都紛紛跑來我的辦公室，說要在臨別前見見真人﹗我估，係公司裡面，都可堪稱怪人一族﹗我相信，做唔做到野，同高調與否係無直接關係﹗﹗假如你做事交待，你唔需要同人打交道都能夠得到信任﹗ 有尐同事你日日見面，一齊食晏，周末一齊出去玩，但係從來唔提家事，亦不談心事，更唔講政治，表面上關係好好朋友，但卻從來沒有交流過大家心中所想﹗又有尐同事，係公司裡鮮有交談，離職後卻不時噓寒問暖，去旅行會搵你問意見，去完旅行返泥會帶手信比你，偶爾也會收到心意咭，明信片之類﹗ 人與人之間既關係真係好得意，信任唔係建基於平日既吃喝玩樂，而係你既言行舉止有幾值得信賴，你可以同對方完全無見過面，但你係其他人眼中既可靠，你係其他人口中既評價，自然會一點一滴咁建立係泥﹗ 作為一個穩形人，好慶幸即便離開左公司，都依然得到別人的信任﹗與其花時間做穿花蝴蝶，我選擇做個做實事既穩形人﹗
