有時會去鰂魚涌商廈區覓食，有唔同菜式揀，環境又夠幽靜，喺太古食完飯，仲可以去睇番場戲添~~你懂的，日本菜係百吃不厭，今餐要食嘅就喺主打健康嘅日式家庭料理－－Camper’s。 豬軟骨野菜咖喱飯 呢度出名咖喱飯，所以我十次嚟九次都會點咖喱飯，今次都唔例外。雖然見到自己啲豬仔同類，有多少唔好意思，但係豬軟骨入口嗰一剎那，我就忘記咗血濃豬水呢啲老土嘢鳥！豬軟骨夠腍又夠入味，食落啖啖肉，足料到極。 除左有足夠嘅肉，仲有幾種野菜，連咖哩汁一齊食，而飯亦加入咗蕃薯同粟米，豐富咗成道菜嘅味覺層次。一餐當中可以食到唔同種類既蔬果，感覺清新健康又唔膩。但唯一美中不足嘅係豬軟骨既醬汁同咖哩汁嘅混合，咖喱汁變得稀身，而且味道有啲啲甜咗，但係總括嚟講都食到我舔舔豬脷。 鴛鴦叉燒烏冬 呢味係偷食豬仔個朋友仔的的，蝦蝦，烏冬食落尚算煙韌，除左兩款自家製叉燒外，亦附有大量椰菜絲，粟米，蔥粒同半隻糖心蛋，材料豐富。但日式嘅叉燒始終太多肥膏（望吓舊叉燒又望下個豬肚仔，觸景傷情) 真係冇乜興趣食得太多。另外呢度嘅湯底都會以清淡為主，如喜歡重口味嘅朋友就可能唔太滿足。 喜歡吃蔬菜既豬仔們，十分推薦一日野菜咖喱飯，據稱呢味菜係提供咗一日所需要嘅蔬菜份量，響應go green，我呢隻雜食小豬嘜係絕對做得到，嘻嘻。 查實我真係幾鐘意呢間主張冇味精，多蔬菜同少油嘅日式健康小店，食完健康嘅一餐，真係要大叫番聲"元氣des"。 價錢: $70 推薦度: ★★★★☆（5粒★為滿分) 坐忘 Camper's 地址: 鰂魚涌濱海街13號中興大廈地下
