初入職場的新人猶如一張白紙，職場如戰場，如果你諗住獨善其身就可以遠離是非，你就太天真了。目前為止，我這個新人踏入職場也只是1年之久，在蚊型NGO做嘢，雖然人少，但辦公室政治依然大行其道。而且女人越多的地方，戰場的硝煙更濃烈，我也難逃此劫，因此在這裡分享我個人的經驗得著，新人可以引以為鑒。 熟悉公司文化和架構 第一日翻工，認識完同事之後，就要儘快熟悉公司文化和架構，了解公司平時如何運作，人事關係如何，應該如何和上司，同事甚至清潔姐姐相處，記住你的一舉一動，公司上下都會睇在眼裏，正所謂做戲要做全套，NGO好講和平相處，所以最好對邊個都同一個態度。 觀察老闆、上司、同事的性格 出嚟做嘢，三分做事，七分做人，平時多觀察老闆、上司、同事如何和其他人相處，如何處事，同邊個比較friend D，鐘意D咩，唔鐘意D咩。好快你會發現對唔同人都要用唔同的相處方式，投其所好就包冇事，唔喺要你擦鞋，曲意逢迎，但多一個朋友就少一個敵人，有起事上嚟，有個人幫下手或者幫下口，成件事就會唔同曬。但就算同邊個同事比較friend D都唔好太張揚，尤其是男女同事之間，因為會容易被人捉住把柄，被大做文章或者被利用。 摸清勢力和派別 當你清楚老闆、上司、同事如何和其他人相處時，你就會發現邊個同邊個friend D，其實間間公司都會分咗唔同ge小圈子，如果A派同B派不孬唔妥對方的話，你要小心唔好踩到地雷，唔好同A派friend又同B派friend， 佢地會覺得你喺間諜，會排斥你。雖然好多人話唔好跟邊個派別，因為擔心有事上嚟，被敵派針對陷害，但咁樣就好容易被所有人孤立，融入唔到佢地，所以表面上都喺要扮認同其中一個小圈子，嘗試融入佢地，例如一齊share 零食，一齊食lunch等。 共進Lunch Do & Don’t 如果你以為上司同事之間一齊食lunch，就當佢地friend咁，咩都share，咁就大獲啦！事實上，食lunch重點不只喺食，而喺收料。所以幾時都要小心說話，千萬不要講太多關於個人ge嘢，反而可以留意其他人分享咗D咩，甚至可以乘勝追擊，延伸同事的話題，一嚟可以表現出你對佢地分享ge嘢好有興趣，拉近彼此關係，二嚟可以了解多D同事或上司另一面，平時相處起嚟更加融洽。 應否幫同事慶祝生日和搞Farewell？ 就算間公司幾細都好，同事起碼都好幾個，如果幫一個同事慶祝又唔幫第二個，俾其他同事見到，咁實有人在背後指指點點，所以要一視同仁，一喺當唔知或者求其講句生日快樂/再見就算，一喺一齊食餐飯/飲茶/買個蛋糕。講真，邊記得咁多個同事的生日，就算記得，下下有人生日就要請食飯/買蛋糕，荷包都幾傷。所以，我通常一視同仁到當日就同生日嗰個人講生日快樂，如果比較friend D 的，就再私底下約佢食飯，記住要低調，唔好俾其他同事知，禮物都最好唔好送，送咗，其他同事知道都算，以後年年這個同事生日，佢就會期望你送禮物俾佢，送禮物要諗送D咩，好煩又傷荷包，所以可免則免，食餐飯咪算lor。 自己生日和Farewell 最後，自己生日都唔好太張揚，如果同事扮唔知就由佢la，佢喺有心的話會約你食飯ga啦。如果自己離職，走之前都請下同事上司食下西餅/下午茶，答謝下佢地對你的照顧和教導，好來好去呀嘛，畢竟香港咁細，山水有相逢，而且reference letter 同 reference check到時都要麻煩到人。 事實上，就算你不犯人，人也會犯你，蝕底的只有自己。以上幾點喺必須要學識的，識小小辦公室政治當防身都好，若想知多D，可以參考以下其他人分享的2條link，我睇完都獲益良多，希望幫到你啦！ 辦公室政治學 http://blog.udn.com/fhshjoy/4520865 十道職場護身符 保庇你免踩到辦公室地雷 https://rich.yda.gov.tw/richCandidate/doc/docDetail.jsp?docID=3E651750B4006467CCF4E09F9C8E1F53
