｛病篇｝ 有感冒者千奇唔好去西藏，寧願等好返先出發。因為感冒會引起肺積水，本來去西藏吸引已經困難、喘氣，如果個肺積埋水更加會透唔到氣，好大鑊！我嚟西藏前一星期左右就咁啱感冒，勁驚影響行程於是拿拿臨去醫院打支針，開左兩日藥，休息再休息，去西藏前好返曬，大感恩！點都好，旅行開開心心，病咗無曬心情影靚，所以隨身帶定啲冒感藥呀、整腸丸呀、白花油呀果啲係必需的。 去到西藏用唔著，感恩！ ｛高山反應篇｝ 其實高山反應並唔係咁恐怖，最多都係頭痛、胸悶、喘氣、訓得唔好而已！以我為例，我到拉薩之後，第一晚出現好輕微嘅頭痛，訓一覺之後就完全無事，可以跳跳扎扎周圍影相。一個朋友第一晚訓唔到，第二日勁累；另一個朋友就第二日胸悶咗一日、無曬心情。之後第三日大家適應咗就無事，係朋友上布達拉宮果陣辛苦啲，行到崩潰咁，我就好ok，個腦仲轉到，可以邊聽當地導遊講嘢邊問問題！ 聽係西藏工作嘅司機講，如果入藏後24小時內無高山反應，之後就唔會有，第一晚唔好沖涼，驚凍親！我地都係第二日先沖涼。入西藏前，個個話要飲紅景天，我飲果啲係煲嘅，木柴咁樣嘅，另外兩個朋友係食紅景天藥丸，咁你識揀啦哈哈。同埋保持心境愉快，唔好太興奮或者太緊張。入藏前都要減低心理負擔，唔好自己嚇自己。如果真係好驚，到拉薩之後可以去醫院開定抗高山反應嘅藥，買樽氧氣頂頂，但千奇唔好倚賴，如果唔係永遠都適應唔到高原。 ｛保暖篇｝ 冬天入西藏，最重要當然是保暖、保濕！我地由香港出發去廣州，過一晚再搭飛機去拉薩。香港、廣州、拉薩，三個唔同溫度嘅地方，著衫要特別小心，稍稍不慎，好易攝親咁就病咗啦！冬天嘅西藏大約5至 -13度，溫差好大，下午可以好熱，夜晚係勁凍，以下係我去西藏嘅由外到內嘅裝束，可以參考下，我自己係運動底，但身體唔係特別好，as mentioned before，嚟西藏前先病完T.T 冬天去旅行避無可避係要著到肥腫難分＞＜同埋去完旅行會發現，張張相都係同一套衫，會有失落感！ 上身： 1、GAP童裝軍綠色大褸，比較重，但非常保暖 2、雜嘜牌棗紅色的冷衫，好密針，夠暖，如果驚凍可以轉著羊毛冷衫 3、藍白色衛衣，入面有抓毛，好好著 4、Uniqlo Hit-tech打底衫，Uniqlo有兩款的，一款入面有毛，一款無毛，薄啲，我揀咗薄果款 5、廟街十蚊對嘅手套，不過我建議去$12店買一對，戴咗都可以用電影相，我果對要成日除出嚟好唔方便，本身唔鍾意戴手套，亦無諗過凍到要戴手套，所以求其買咗對>.< 6、淘寶三十蚊雜嘜牌帽，既美觀又保暖，覺得自己好叻！ 7、綿質口罩五蚊人仔，因為冬天嘅西藏好多地方都係燒柴或者燒煤炭保暖，所以周圍空氣都麻麻，戴個口罩仔穩陣 8、花園行雜嘜牌格保頸巾，夠厚就ok 下身： 1、Uniqlo運動褲，入面有毛的！但唔夠暖，入面再著多兩條legging先夠 2、花園街雜嘜厚襪，底有防滑膠粒，感覺隻腳唔使成日抓住個地下，行起來好舒服，不過我係果啲手凍腳凍嘅人，試過著兩對襪都係咁，最後放棄，著返一對算了 3、童裝timberland行山鞋，冬天西藏好少落雨，落雪機會大啲，所以著行山鞋會無咁易入水 PS：如果會上珠峰或者納木措等海拔較高嘅地方，就要著多條褲、襪同埋著多件薄風褸仔響入面，西藏係可以一日經歷曬春夏秋冬嘅地方，注意身體暖度，自行加加減減。同埋記得帶啲暖包暖貼暖手包睡袋，最重要係暖水袋！夜晚訓覺果陣有個暖包攬住訓差好遠！ 推薦推薦！好用！擺佢入衫袋褲袋，手凍果時可以拎出嚟暖下，好持久！ ｛保濕、防曬篇｝ 原來最重係護膚品＞＜ 1、Neutrogena Hydro boost night concentrate晚霜，真係好好用，佢入面果啲藍色粒粒一搽上面就吸曬，好正！每晚都會厚搽當敷mask！平時係香港只需搽薄薄一層就夠！堅好用！ 2、Garnier Aqua Defense日霜，黎到呢度完全唔夠保濕，就算係香港用都係麻麻，唔明點解咁多blogger話好用架T.T感覺被騙！ 3、Lanolin Cream with Collagen and Elastin，澳洲朋友送嘅羊油，超潤超保濕 4、Aquamoist深透保濕液，台灣買保濕霜送嘅化妝水，搽保濕霜之前搽兩層，好潤！同極潤化妝水差唔多 5、呢枝係萬能嘢，邊度乾就搽邊度，晚晚訓前厚厚搽係咀唇，第二日潤唇膏都可以懶得搽 6、Vaseline Lip Eessence，因為夜晚用咗萬能野當唇mask敷，求其用一支潤唇膏都得 7、Shaka body lotion，去意大利果時買落未用，見細細支就帶埋嚟西藏，滋潤度一般 8、Fancl washing power，去日本果時買落，液體會比較重，洗面粉會好啲。細細樽，夠三個人用 9、Za防曬霜，SPF40，PA+++，一直防曬都係呢隻牌子，台灣買平好多，平時用SPF26就夠 PS：太陽眼鏡可以帶定，但我地好多時都用唔著！
