今日原本出去有啲野做，點知俾人放飛機。唯有喺附近搵吓嘢食啦。估唔到工業區入邊都有一間裝修咁舒服嘅coffee shop。點擊圖片放大 因為工業區嘅關係地方都比較大所以都好多張枱，而佢啲卡位都唔少㗎 一坐低職員已經會俾個口罩套你，方便又衛生。 男朋友未食早餐所以就揀咗個鰻魚意粉。佢將一條完整嘅鰻魚切開三片，份量絕對唔會偷工減料。而啲意粉真係好彈牙， 絕對係有過冷河，加埋啲忌廉汁真係，西日合璧。 而我自己就揀咗個炸雞班戟，淨係個賣相都好吸引。 佢啲班戟比較實心同埋厚，但係都算鬆軟，所以食晒成個餐都幾飽肚㗎。 而佢啲炸雞都好唔錯，除咗基本嘅Juicy之外，佢啲炸粉一啲都唔厚。 佢個餐仲包左餐湯，今日係南瓜湯，佢個湯入邊仲有好微粒嘅南瓜蓉，味道又唔會太甜，剛剛好。 飲品方面，離唔開咖啡嘅男朋友今次叫咗杯玫瑰咖啡，除咗玫瑰糖漿之外佢仲有啲乾嘅玫瑰花喺面，真係睇得又飲得。而佢玫瑰同埋咖啡嘅味道都好夾，兩者嘅味道唔會互相覆蓋但係又可以混合埋一齊。 而我自己就試咗佢嘅棉花糖朱古力，佢呢杯朱古力本身係無糖嘅，所以味道比較偏苦，不過如果鍾意食黑朱古力或者飲齋啡嘅人，應該會覺得好好飲。👉🏼 Coti the Bistro地址: 新蒲崗五芳街31-33號永顯工廠大廈地下C號
