平時好少去奧海城，但一直都知道呢度有一間食西班牙菜嘅餐廳，但懶得走過去。今日放工終於的起心肝，捉埋男朋友揸車過去試一試。 餐廳嘅特色食物都幾多，至少唔係咁容易喺出邊搵到，睇住個Menu，其實每一款都好新奇、好有特色。而且佢哋基本每一款菜，都有圖片參考，唔使怕唔知嗌乜好。 西班牙正宗奄列，並唔係奄列咁簡單。 口感比較實淨，除左蛋同薯仔，入邊釀左啲椒入去，蛋味重，椒味清新，幾特別嘅一道菜色。 鵝肝蟹肉燕麥餅配黑魚子醬，鵝肝味道超級正，而且非常Juicy，咬一啖就爆曬汁，燕麥餅嘅配搭非常好，軟身嘅鵝肝，搭配脆身嘅燕麥餅，口感同味道兼備。蟹肉加黑魚子醬，加上燕麥餅，味道都非常出色，雖然餐牌上面只係寫咗得兩件，但其實好大件，個人覺得係必食之選。 白酒忌廉煮深海藍青口，青口啖啖肉，難得嘅係佢哋處理白酒味道處理得非常好，因為出邊好多都會冇左白酒嘅味道，搭配忌廉鹹度適中，高質之選。 馬德里傳統燉牛肚，對於我哋嚟講，味道都非常新鮮。平時食大多都係酒樓食既咖喱牛肚，但原來以西班牙式烹調，味道截然不同，非常香濃。搭配紅蘿蔔仔，一啖牛肚一啖紅蘿蔔，可以中和到牛肚味道，濃得黎又有點清新。 西班牙經典燒雞，原本其實都擔心燒雞會唔會煮得太硬太老，但佢哋處理得好好。 皮脆肉滑，而且非常多肉汁，脆皮加上鮮嫩嘅肉質，真係會食唔停口。就連雞胸部份，都唔會有一種硬身嘅感覺。另外值得一提嘅係，佢哋連雞胸部份都拆埋骨，唔使怕要拆骨咁麻煩。而配菜牛油忌廉炒雜菌，亦都好Fresh，味道適中唔會太濃，配菜首選。 今次其實我哋嗌多咗嘢食，原本以為佢哋嘅份量會好小，但原來每一份都大大份，食到要捧住個肚腩先離開到餐廳。買單八百幾蚊，其實介紹一個餸都夠，平均都係四百幾蚊一個人，已經可以食到咁高質嘅西班牙菜，絕對超值。🚗🚙🚗🚙🚗🚙🚗🚙🚗🚙🚗🚙🚗另外值得一提嘅係，奧海城泊車優惠都幾抵，$200就有兩個鐘免費泊車，食個飯其實已經夠晒數，諗諗吓其實都唔係咁偏僻姐。👉🏼Cocina 3 Tapas Restaurant & Bar地址: 大角咀海泓道1號奧海城三期地下G22號舖
