上網搵到鴻圖中心原來有法國菜食，男朋友話未試過法國菜所以同佢一齊嚟試吓。 而佢個餐牌都好似幾多選擇，價錢都中規中矩。但係佢呢度勝在地方夠大，好啱一大班朋友約埋上嚟食下西餐傾吓計。 坐低冇耐佢哋就會想佢哋個法式麵包，入邊有三款唔同嘅麵包，其實我覺得三款都好好食，因為個麵包上嚟嘅時候暖暖地，搣開嘅時候除咗好軟熟之外亦都有一定嘅韌度。 前菜我哋揀咗個香草法式焗田螺配多士，我覺得呢個價錢都幾抵食，因為雖然個碟係六個坑可以俾你擺六隻田螺，但係佢啲田螺一定唔止六隻，雖然有兩隻色都有沙，不過呢個價錢還可以啦。 佢呢個除咗落咗香草之外仲有大量嘅蒜蓉，而佢個蒜蓉汁攞嚟查多士就變成蒜蓉多士，都幾香㗎。 我哋嗌左其中一個主菜係安格斯極黑頂級一口牛柳，同樣地佢都有多士跟埋俾你，但係呢個多士我就覺得硬同埋乾咗少少，不過可能佢係俾你點汁食嘅。 但係佢個牛柳就變咗10成熟，對我哋來講韌咗少少。 另一個就叫咗法式慢煮油封鴨髀，佢個鴨髀外皮好脆，口感不錯。但係鴨肉就比較林身，一切就會散開，似乎冇咗慢煮應該有嘅嫩滑。不過佢底下個薯蓉就好好食，係用完個薯仔壓碎，食到薯仔本身嘅甜味。而佢啲紅椰菜都唔會太酸，味道剛剛好。
