連續兩年都去左大阪旅行, 無計啦, d機票實在太平, 唔去對唔住自己. 來緊就同大家分享下呢2次大阪trip食左d咩, 同埋究竟值唔值得去食. 講到大阪人氣甜品, 必定榜上有名的就係gram pancake. 來之前已聽聞限時(11am, 3pm, 6pm)限量(20份)供應, 要提早1hr去排隊至食到的, 講到咁誇張, 當然不能錯過啦. 我去的係心齋橋本店, 係swatch樓上, 2點幾去到排隊, 竟然話有一張吉枱可以俾我地入座先, 不過pancake就要3點至有得食. 真係好好彩, 唔使罰企一粒鐘, 咁我地當然叫杯野飲, hea住等~~ Premium Pancake來啦, 有3層, 每層都有2cm厚 (睇見都心心眼). 雖然望落好似好大份咁, 亦都有一刻覺得會食唔晒, 但其實係諗多左@@. 呢個pancake易入口, 好似食緊上海餐廳果隻甜品高力豆沙咁, 軟綿綿+好香的熱香餅味, 一啖接一啖, 好快已經解決左2層. 食到最後一層時, 係會放慢少少, 此終唔係食空氣, 都要抖下飲下水, 不過係食得晒的. 呢個pancake真係好好食, 認真的推薦大家來食, 不過如果唔係好大食的, 可以2個人叫一份. 其實好矛盾, 我同個fd都覺得起碼要食2層/人, 如果share一份, 好似有d到喉唔到肺, 最後我地2個女仔, 每人叫左一份, 呢個下午茶真係好滿足.
