Aloha！今次係小思子第一次寫Blog，等我同大家介紹返小思子去6日大阪嘅精彩片段啦。 Day One❤️ 小思子第一日落機就已經2點幾，然後就開始急不及待咁去12號車站排隊去機場附近既Rinku Premium Outlets啦！ 個outlet都幾大下，shopping完之後6點幾已經入黑，outlet個夜景係咁嘅～～仲有個摩天輪係隔嚟添架，超靚！ 小思子行完街肚餓就梗係要去祭下我個五臟腑架啦 :lol: 之後我就搭JR係咁轉線，終於搭到去道頓崛！小思子就係住係心齋橋附近，步行約5-10mins嘅Hearton Hotel Shinsaibashi。 好啦，講左咁耐，最後我就去食左大阪好出名嘅四天王拉麵><小思子叫 左碗豚肉濃湯拉麵加煎餃子，小思子嘅友人就叫左碗醬油拉麵套餐嘅物體，總之就係一碗拉麵加碟炒飯咁啦！其實唔知大家鍾意食咩麵？其實個麵係幾好味，不過小思子本人比較鍾意一蘭拉麵果種麵嘅質地多d！ 個炒飯鹹得嚟又幾好食><小思子好鍾意食個炒飯！ 煎餃子都一般，無咩特別。 填飽個肚之後無咩做就梗係周圍行下啦！咁行到悶悶地，肚仔又開始消化，嚟到道頓崛，側邊咁多小食店，唔係唔食野啊嘛？！ 所以小思子就一於試試大阪嘅章魚燒係咪真係會好食過香港果d先 ^__^！ 最後試驗結果就係即使有好多人排隊，間野都未必好食 小思子唔會話比你地知香港果間X船仲好食過依檔章魚燒....事關依檔野d章魚燒係冧嘅，或者當中有讀者鍾意食冧，不過小思子覺得好差T_T咬落去好似一「劈」野咁，同我一樣鍾意食開外脆內軟嘅讀者就唔需要試依間啦 Day Two❤️ 話咁快第二日一起身就即刻去多次心齋橋影一影早上嘅風景 跟住就事不宜遲，即刻開始今日嘅重點旅程，往奈良出發！ 奈良最出名就係小鹿，小鹿公園，柿葉壽司...... 登登登凳！！！！ ⭐️ ⭐️ ⭐️ 溫馨提示：小鹿一見到鹿餅就會好猖狂，好興奮，會一群跑過嚟追住你，咬你件衫，可能會有意外發生！帶著小朋友嘅讀者，要注意啊 ! 不過公道d講句，其實小鹿一般情況下都好溫順，唔會亂嚟，會乖乖咁比人摸。想同咁可愛嘅斑點小鹿影相，就不妨去奈良公園探訪下佢地啦！ 臨離開奈良之前，小思子都有周圍行下，附近有好多小店賣奈良紀念品同各種小食。價錢得宜，紀念品又有特色！小思子都好推介係奈良買下特色手信！而以下依間就係好出名食宇治抹茶口味嘅麻糬！暖暖地都幾好味架，咁具日本特色嘅小食，小思子又點會唔推薦？ 離開奈良之後，小思子見仲有時間就去埋萬博紀念公園站嘅Expo City度，係個新開嘅商場，好多人架！不過都有好多野行，小思子花左半日時間都行唔曬。 入面有賣飾物嘅Peach Club，有好大間Loft，有麵包店，有foodcourt，有supermarket，林林總總。 行完之後就出返道頓崛食晚餐，今餐就係食一光佐賀牛！ 好食嘅有五花腩，牛肩，牛大臂內側 比較韌d就係橫膈膜，唔推薦大家食，牛舌都好細塊，唔抵食！ 好啦，小思子今日就同大家分享頭兩日嘅行程，之後四日嘅旅程介紹陸續有來，多謝大家支持！ 小思子第一次寫嘅blog未必好好，會係未來再作改善。
