點擊圖片放大 自己生日自己整，星期六body check完之後，冇事冇幹終於放下心頭大石，星期日就整咗個生日蛋糕俾自己，係自己最愛嘅口味 — 雲呢拿白桃紅苺mousse蛋糕，出面點會有呢款咁原味天然嘅款式呢~ 最愛雲呢拿籽嘅香味！雪芳底：蛋黃 3隻 / 蛋白 3隻 / 砂糖 80g / 低筋粉 75g / 發粉5g / 油 30g / 牛奶 80g 蛋白打至濕性發泡，逐少加入40g砂糖至挺身。拌勻蛋黃及40g砂糖，加入雲呢拿籽，牛奶及油，拌勻。先將少許蛋白拌入蛋醬內，分次篩入粉類，拌勻，再分次加入蛋白，拌勻。放入已預熱焗爐180度焗約25分鐘。取出倒扣放涼。雲呢拿mousse：淡忌廉 200g / 砂糖 40g / 牛奶 100g / 雲呢拿籽 / 魚膠片 7.5g牛奶加熱至微滾，加入砂糖及雲呢拿籽，拌勻，再加入已浸軟的魚膠片，拌勻。將淡忌廉打至soft peak狀，分次拌入牛奶，拌勻。組合：蛋糕切片，先塗上紅苺果醬，放上白桃，再倒入雲呢拿mousse，放雪櫃至凝結。脫模，裝飾，完成。
