好多人會覺得空姐好易做，淨係上飛機派下餐 更加有人會將空姐同侍應劃上等號 但其實空姐又點只淨係派餐咁簡單呢? 記得Training既時候，Trainer問過一條問題 「The Roles of Flight Attendant」 令我知道其實空姐係一個一人分色多角既職業 1. 消防員 空姐受過訓練如何撲滅火種 飛機機艙如果起火，我地要負責滅火 當然飛機機艙起火原因有好多 乘客電子用品、飛機焗爐、飛機儀器等 滅火方法都有唔同，我地都受訓練去處理 2. 急救人員 空姐上堂學過急救，而且每年要複考急救 心肺復甦法(CPR)係每位空姐都一定會識 係飛機上有乘客感到不適或有病復發 什麼心臟病發、心絞痛、食物中毒等 我地都知道如何處理、進行急救及尋找醫療協助 真係少D應變能力都唔得! 3. 警察 飛機上有時會有不守規矩，蠻橫既乘客 我地有指引將乘客不守規矩既程度分等級 再按等級作出相應既行動 輕者如不遵守空中服務員指示、向空中服務員用粗言穢語等 會有口頭警告、書面警告 重者如向空中服務員動粗、硬闖駕駛艙等 將會被制服扣上手銬，並會通知目的地執法部門接手處理 如何在機上處理和制服此類乘客，我地都有學 4. 逃生專家 當飛機遇上意外，機上所有人要逃生時 我地都受過逃生程序同步驟既訓練，而且每年都要考試 係地面上既逃生?定係海面上既逃生? 唔同既情況都會影響到究竟用邊對機門逃生、 要帶走機上咩儀器同物品逃生、 以及如何利用佢地以增加生還同獲救既機會 而且係遇到呢D危急情況都要處變不驚! 以上既所有都係拯救生命既職責 而且所有都係每位空中服務員既職責 雖然表面睇黎空姐只係每程機派飛機餐 我地都唔希望機上發生突發事件，要我地使出真功夫但我想話俾大家知其實每位空中服務員都唔簡單架! 而且絕對係值得大家尊敬既職業! 更多小菲菲空姐既日常，請Like FB: www.facebook.com/littlefifi.diary 歡迎合作邀約，EMAIL: fionchan2003@gmail.com 圖:意大利羅馬既許願池，希望每程機都順順利利!
