上回提到搭船出左保戶島到睇貓貓 係玩完貓之後，我地係島上食左一餐吞拿魚全宴 依家就等我介紹比大家啦 首先介紹下呢間餐廳先 佢叫做 穗門島 大川 佢係位於半山既，所以去之前最好問一問島上既居民 佢地都樂意帶你去 真心講句，未去過既人，都幾難搵到 很抱歉唔記得影個門口比大家睇下認下 保戶島本身都係出名食吞拿魚既地方黎 而係島上比較出名既食物係日向丼，即吞拿魚丼飯 但今次黎係食再豐富D既吞拿魚全宴 簡單黎講，唔止係佢既肉，係連佢既內臟都會有機會試到 因為當日只係得我地預約左，所以我地就好似包起左成個場咁 呢到係好傳統既日式餐廳，所以我地都係坐榻榻米 一坐低就見到下面有一堆餐具等緊我地 再望下個牆，見到有幅好大條既吞拿魚 話釣到最長既吞拿魚係170CM長，65KG重@@ 勁大條 係上菜之前，老闆話我地知一般食呢個餐既話 冷同熱既食物係會分開上既 但因為我地係去做類似體驗既關係 老闆建議我地一次過上曬D食物，等我地影相都好睇D 真係勁貼心 好啦，即刻睇下成個餐有D咩先 望落係咪好誇張呢 跟住落黎就介紹下每一種野食比大家 首先係吞拿魚既刺身 分別係拖羅同赤身 老闆建議我地赤身配蛋黃醬同特製醬油 咁樣食落會比較豐富，唔會咁快覺得膩 而拖羅則配芥末同醬油 芥末同樣係可以帶走拖羅既膩架 再黎既就係胡麻醬配赤身 將碗中的所有材料混合好之後，全部淋係熱呼呼的飯上面一齊食 正 再黎既就係新鮮炸好既吞拿魚 唔好睇佢炸到好似好乾，好無肉咁 但其實佢入面好肉同勁JUICY 最最最重點要介紹比大家既就係吞拿魚既內臟 而我地今次既食法係用陶板黎燒 先介紹下今次有咩內臟會試到XD 右邊佔大部份既係魚既心臟 而中下白色既都係心既一部份，係比較爽口D既 中上個PART就唔係好記得係咩 心臟既部分等個陶板夠熱之後放落去 每邊只係需要20秒左右 佢會好似食肝咁，會變成啡啡色 食落直頭係肝既質地 而其餘兩種就比較要耐少少 大約分零兩分鐘咁 因為燒完之後會有唔少既油留低係個陶板到 所以左邊既芽菜我建議最後先放落去燒 咁就可以吸曬所有既精華，一流 仲有不得不提既就係佢碗湯 提提大家佢係有山藥係入面，所以個質地有黏黏地既感覺 同埋湯係用魚一齊煲既 所以一定。一定。一定係佢黎到既時候就飲左佢先 如果唔係真係好難入到口=( 最後介紹既係以下碗寒天 大家可以係一開始或者最尾先食佢 佢個汁酸酸地咁幾開胃 最尾先食既話又可以幫你帶走油膩既感覺 的確幾好 講到呢到，我終於介紹完呢個咁盛大既吞拿魚餐 佢雖然要成2千幾YEN一位 但係我覺得老闆所付出既心機同食物既質素遠遠超過呢個價錢 有預算既你地不防試下呢個餐 無預算既話都可以試下佢地個日向丼 試下呢個島最出名既吞拿魚 店舖資料: 名稱: 穗門島 大川 地址: 大分縣津久見市保戶島1120番地 電話: 0972-87-2024 FACEBOOK: 穂門島大川/保戸島のお料理屋 想預約既話大家可以用FB MSG搵老闆架 多謝大家比心機睇完我既介紹 想番去睇下偽。本地人深度遊個總覽 可以 按此 想問多D既話歡迎用以下途徑搵我 Email: choitsz_wing@yahoo.com.hk Facebook: littlecongi分享地攤 Line: ck6057 Instagram: little_congi / congi_store
