今年男友生日想食法國菜，因為之前試過一間餐廳覺得搭配特別，味道更一試難忘，因此佢今年又想再嚐法國菜。為左滿足佢個胃，我訂了這間在IG人氣不錯的3星餐廳黎試試。一坐低，待應擺低兩本菜單叫我地揀套餐就走左，咩都無介紹，感覺與3星米芝蓮的服務標準不符。不過我見隔離果枱講英文，佢就好殷勤地介紹，難道我個樣似貴婦，食開法國菜?？我地討論左一陣，佢見我地仲未決定先行返過嚟快速地介紹一轉。我地決定試4道菜 ($890) 的套餐。首先，餐前麵包嚟講，佢個份量真係好多，不過一次過擺晒出嚟，好快就會失去麵包原有嘅口感，不能保持新鲜，這也是敗筆的地方，最後我地食唔晒，仲打包左好多返去。 接住上amuse bouche, 這是挪威三文魚配牛油果醬汁，加上三文魚籽、脆片一齊食，口感豐富。牛油果醬汁較杰身，好幼滑，不會搶去三文魚的鮮味，不過沒甚驚喜。 到starter, 我點的是北海道帶子配芒果醬汁，味道好清新，而且擺盤好精緻，令人賞心悅目。 不過比起我點果道菜，男友點的味道明顯濃郁更多，麵包夾住豬肉、磨蘑，再加上黑松露醬，其實都好好味。 然後上了蘑菇雞湯，侍應會先端上放有蘑菇的碟子，然後係客人面前倒入清雞湯，味道清淡，但充滿雞香。 主菜方面，我聽取了侍應的建議點了龍蝦意粉，說是他們午餐的招牌菜。本身以為無咩特別，點知一見到真係令我喜出望外，未試已經聞到好香!!!而且龍蝦睇落好足料。一食，意粉完全吸收晒龍蝦醬汁嘅味道，超香濃，而龍蝦亦沒有令我失望，肉質好爽好彈牙，鮮甜！呢道真係我食過最好味嘅意粉，沒有之一。 男友點的是香煎豬扒，佢經常講，要試一間西餐質素，最好就試豬扒，如果豬扒都整得好食，咁餐廳質素唔會差。佢呢塊豬扒顯示餐廳質素高，豬扒表面煎得好脆口，入面好嫩滑，口感豐富。薯蓉亦好creamy幼滑。 最後甜品方面，我地無揀到朱古力蛋糕配雪芭等甜品，反而想試下佢嘅芝士拼盤。可惜由於男友揸車，未能配以紅酒品嚐。不過3款芝士當中有2款都好咸，係好咸！！就咁真係食唔到。我地淺嚐兩口就算了。 反而petit four好精緻，好味！ L'Atelier de Joël Robuchon
