在銅鑼灣返工N年了. 以前初初出黎做野, 銀包開始有少少錢, 返工梗係唔鐘意帶飯既. 何解?當年覺得老土呀!(咁當然依家人大左, 覺得$$重要D, 老唔老土, 都冇乜所謂) 晏晝鍾意同D同事周圍搵下食啦~起碼出去講下是非都方便D啦~ 同男同事呢, 梗係食飯, 如果要食舊式上海野, 渣甸坊有一品香啦(選擇多, 有小籠包呀, 窩貼呀, 又有客飯, 又有例湯, 抵食呀)(好可惜, 佢喺31/1/2015已經光榮結左業). 同女同事呢, 冇飯氣, 通常都係女人街(即係渣甸坊)入面既忠記咖啡屋, 榮記粉麵, 時代廣場附近既新記車仔麵, 呢幾間都算係當時既至愛. 只可惜, 隨著歲月流逝, 物非人亦非, 隨著同事先後離開, 加上年紀大, 又懶懶地, 唔想行, 依家都要開始食住家飯啦. 同埋, 仲有最重要既因素: 1) 銅鑼灣既食肆越黎越少, 變晒D金舖, 錶舖, 藥舖呀, 「屈錢紙」或者「萬ing」. 2) 物價飛漲, 以前$3X可以有個餐, 整整下, 外賣都要$3X, 入去坐低食, 兼要間食肆似少少樣既, 冇番$5X-$6X, 你都唔洗諗. 有時, 唔係話你食唔食得起, 而係, 你要俾$, 仲要有時間排隊, 呢樣先至玩死你. 算啦, 係時候修心養性, 安份守己啦. ~~~~~~(開始離晒題添...!) ~~~~~~ 話時話, 間一品香31/1先至光榮結業, 今朝(3/2)經過, 佢個舖入面好似已經開始有裝修(?)了. 你睇下, 呢D就叫做效率啦. 唔知第時, 又會變成ABC餐(D金舖, 錶舖, 藥舖)邊餐呢... 今期攝影裝備:Samsung Galaxy Mega 2 註: 本文章純屬個人意見.
