環島旅程第七站 嘉義縣 一講到嘉義縣大家都會即時想到阿里山，其實小酷米一直都想去阿里山，但一直都冇機會..... 本來小酷米打算參加local tour，《阿里山一天遊》，但礙於我係"獨行俠"，旅行社話要四人先成團，所以告吹....不過個旅行團幾方便，大家可以參考下: 阿里山森呼吸一日遊 NT$1,999/1人，包含阿里山遊園小火車車票、阿里山入場卷、午餐及回程共乘車。因為上阿里山嘅交通比較麻煩，每日來回都只有一班車，時間又惡夾，所以"獨行俠"想自由行阿里山真係難啲，最後只好喺阿里山嘅山腳奮起湖行下當去左.... 我太睇小"阿里山小火車"車票嘅搶手程度，我大安示意咁當日出發當日買飛，點知去到車站先知道去程已經Full左，回程淨返一張飛... 當我煩梗要不要更改行程嘅時候有"泥鯭的" "R"生意，佢建議我照買回程車票，上山就坐佢地嘅車，咁樣我就可以去到奮起湖又可以體驗阿里山小火車。阿里山小火車車資*NT$240，車程要2個小時20分鐘，而"泥鯭的"車資只需NT$220，車程1.5小時而已，又平又快捷，不過都係果句，要考慮安全問題喔~(*2016/5/1起阿里山小火車車資更改為NT$384，要注意哦) 雖然"泥鯭的"又平又快捷，但舒適程度就......><" 當日小酷米坐果駕所謂"泥鯭的"係一部7人車，車上計埋我同司機都只係5個人，有冷氣、都唔會話"焗束"，行車速度平均，但路途要不斷上斜同轉彎，而且重係賽車電影入面常見嘅"髮夾彎"，連平日唔怕坐長途車嘅小酷米都覺得唔好受，落車時都有啲頭暈，所以大家帶埋暈浪丸出發穩陣啲 點擊圖片放大 人生第一口鐵路便當 好老實，小酷米之前一直誤以為鐵路便當只係"頹飯"，但最後一試愛上，"頹飯"定義改觀。 一盒要價NT$170(HKD$42左右)其實喺台灣黎講依個水位真係高左啲，不過材料幾豐富，我點嘅係中興號，入面有12種配料，食完飽到夜晚，重有高山茶任飲添..... 另外，佢地重有個好有趣嘅找錢方式..... 零錢會從"之"字形路軌瀡落黎，重會一路聽到火車嘅叮叮聲添 唉..........王子去旅行旅店，王子唔係住王宮....？！ 依次環島之旅小酷米一共轉左7間酒店，因為旅費所限必需"睇餸食飯"......王子去旅行旅店十分近火車站、附近食市亦就腳、早餐豐富、用餐環境十個讚，員工好友善、勤快！但房間環境真係一般般.... 整潔度還好，間房好多塵;隔音奇差，可以聽到隔離房睇咩電視台，黑仔嘅係唔知隔離房咩構造，由夜晚9點開始久唔久大叫大笑，冇內容嘅純大嗌，嗌到11點半，最後忍無可忍之下同職員投訴，由職員迅速擺平(所以我話員工十分勤快);但最令人不安嘅係門鎖安全，個門鎖真係重"牛"過我睡房個鎖，好似稍為大力小小扭就可以唔洗用鎖匙開門，而且個鎖重搖得郁，基本上依2夜只係靠門上面條防盜鐵鍊輕輕扣住，同埋自己搬同篋頂住隻門....外出我唔敢放貴重野喺房，攪到差唔多要孭晒啲家當上奮起湖.....出遊咁多次都未遇過依重情況，可謂印象深刻，一分錢一分貨依個道理我明白，入住2晚HKD$590(Agoda)(並不是區內最平)，所以大家預算多啲嘅話，建議黎嘉義玩嘅時候考慮其他旅館..... 話雖房間設施唔低掙，但都不能抹煞一點點好處... 佢地嘅早餐唔錯，不過餸菜冇得簡，清一式！但用餐地點睇得出有用心佈置過，如果啲房都係咁就好LU..... 我明明有影低房入面罪證相.... 但返到香港啲相唔見晒，咁嘅旅館連相機都嬲....(或者係我嬲得濟剷左)...... 下一站係....雲林縣 歡迎LIKE我地嘅FB專頁，謝謝！台灣追星星手記 第一站: 宜蘭縣 礁溪每日溫泉旅館 & 溫泉蕃茄 第二站: 花蓮太魯閣 & 全台最接近太平洋的"巨無霸"郵筒 第三站: 台東 鄉村藝宿民宿 & 卑南文化公園 第四站: 屏東縣全台最南面的盡頭 墾丁 鵝鑾鼻 第五站: 高雄縣 令人又愛又恨的橙屋商旅 & 橋頭糖廠 文創藝術村 第六站: 台南縣 全台灣最西面的盡頭 國聖燈塔(七股燈塔)
