26/5 星期四

呢一日心情好沉重，因爲呢一日係我逗留係日本嘅最後一日。|好多地方我都未去，確實好有遺憾，然後夜晚8點就要上機走。
(不過高興嘅係我係2017年又再去左次東京！請睇6日5夜獨遊東京及東京近郊美食觀光之旅系列)

呢一日Plan左去築地市場，然後直接出機場，再去最近成田機場嘅Shisui Outlet(酒酒井outlet)血拼一番。

原諒我呢一日無相比大家睇，因爲呢一日好趕，而且無咩心情影相，所以今日呢一章全部都會係文字。

呢一日因爲朋友冷親，所以狀態唔係幾好，所以都休息左一段時間先出發。
本身我Plan 9點出發-->10點前抵達筑地市場-->1點前離開筑地去到上野答京成本綫出發去機場，比3-4個鐘頭行街。
但可惜因爲朋友不適，最後都成1030先出到門口。不幸嘅事情就發生！

之前諗住搭都營去，不過就慢d，但直接去到。不過由於遲左出門口，所以我地就選擇左更快捷嘅方法，搭JR出新橋再係附近轉都營去。
因爲板橋位于琦京綫，所以我地要係池袋轉山手綫。

一入到列車，坐左一陣，發覺點解仲未開車.....
可能平時係香港習慣左所以無爲意，我地都慢慢等。
等左其實都成10分鐘，我地開始覺得疑惑。
因爲車上嘅人有少部分落車，我地更加唔知發生咩事。我地唯一聽到嘅就係廣播不斷講抱歉，其他野一概唔明。
之後我地望一望指示屏，發現原來係池袋發生事故，寫住"passenger injury"。諗住既然池袋呢邊唔得，咁我就去赤羽然後落上野個邊啦！

去到赤羽個陣其實都已經成11點過d，我地個陣已經開始有少少餓，但爲左築地都要忍！
我地落車準備轉搭京浜東北線落上野，點知發覺京浜東北線、湘南新宿綫都係Delay。但無辦法嘅情況下我地都要上京浜東北線，見到都係一樣嘅廣播。
先發現，原來日本鐵路有規律到咁，其中一條綫停，其餘絕大部分都會受影響。
結果我地on居居咁坐係列車度等。時間一分一秒過去，到1130列車先開出，仲要係慢駛。

接過我地去到上野已經係1215左右嘅事，我地諗左陣就決定放棄築地市場。
原因係去築地市場需要再多d時間，如果去埋築地市場就可能要放棄outlet。
基於我朋友對築地市場興趣不大反而想買野，而佢係京都已經遷就左我一次去咁多寺廟，所以我今次就順我朋友意思，然後心裏面暗自立下要係築地搬之前去一次！

結果我地係阿美橫町度食左餐豐富午餐就搭京成本綫離開。
一開始官網寫Access Express5X分鐘，結果係60分鐘左右；而京成本綫就寫66分鐘，我信左，結果75分鐘有多先到，坐到我patpat都痛。
然後我即刻去租左個locker擺行李，事不宜遲去買車飛出發去outlet。
車費700Yen來回，係二號客運大樓巴士站個頭嘅counter買。

較好時間就上車，15分鐘内就會到。去到outlet，見到係一個好有歐洲特色地方。(幅圖上網揾)。

呢度品牌都好多，有賣碗碟、服飾、手錶同食品。

好似服飾都有一衆運動牌子：Nike/Puma/New Balance/Columbia/etc

休閑品牌：American Eagle/Gap/Tommy Hilfiger/Levis'/etc

高級品牌：Michael Kors/Polo Ralph/etc

食品：Garrett/Godiva/California Pizza Chicken/etc

呢都算係比較好行嘅outlet，好適合年輕人去，因爲比後生仔品牌都好過。

結果我係Gap買左一件Zip-up hoddies(2600Yen)、一件Pull-over hoddies (2600Yen)同一件Tee(1200Yen)；AE買左兩件tee (total 3500Yen)；Nike波鞋(4900Yen)；Guess手袋比媽媽(8900Yen)；New Balance tee(1400Yen)。

看似好似唔多，但因爲係關西個陣都買左唔少。
而6點個陣就搭翻巴士去機場，然後pack行李寄艙。
我同朋友因爲第一次坐廉航，所以對行李重量印象好模糊，我地當時求其買左30kg。
點知發現30kg根本唔夠！我去到4樓嘅磅度量重量，發現我自己一個行李箱已經成20kg，而我朋友都成16kg！多左6kg點算？？？？？？
好彩我自己本身估到有機會爆，所以我帶左個背囊黎，將d重又細嘅放係背囊。
同時，除左手袋/背囊呢d，每人仲可以有一件hand carry。
所以我就將所有手信擺係一個大紙袋裏面，盡量減得幾多得幾多，我個fd都係咁做。
結果我地去寄存個陣，兩個行李箱加埋都係31.7kg，而地勤姐姐都好好人比我地過.....太好啦！

不過由於我地執行李執得太耐，成7點3先寄存好行李。
又知道登機閘口一定係好遠，所以預左一定要7點半離境，順便早d去費事比人霸曬飛機上擺行李個位。
得15分鐘，結果我地去左便利店，買左d飯糰、便當、麵包呢d。麵包、飯糰就偷偷帶上機(唔好太張揚，班空姐空少會隻眼開隻眼閉)，而便當就係附近揾個位食。
題外話，日本便利店連便當都好好食。

之後就上機，11:40pm返到香港，完成呢次旅程。

成功發佈