17 JULY 2014(THU) 睇吓依個為食嘅小小豬，佢食緊乜嘢食到個樣咁招積呢？ 今日又有新嘢食，因為我地小豬家嘅親子廚房又出動，今次整左簡單易整嘅金奇異果雪條呀~ 係依個炎炎嘅夏天，唔好話我地大人，就連小朋友都好想食啲雪糕雪條消消暑。 小小豬當然唔例外，雖然我地都間唔中都有俾雪條佢食，但我都總係覺得食得太多有色素嘅雪條好似唔係太好，所以就打算自家制嘅生果雪條俾小小豬食，咁就食得健康啲啦！ 前幾日我係超級市場買左啲金奇異果，所以就同小小豬一齊整雪條啦~ 題外話：上次我地參加比賽之後，大肥豬就幫小小豬KEEP起左頂廚師帽，等佢留為紀錄。點知當小小豬知道我地一齊整嘢食時，小小豬即刻話要戴住嚟整嘢食，真係俾佢笑C呀！ 我先將啲金奇異果去皮切開一半，之後嘅功夫就交俾小小豬啦 ~ 小小豬負責將啲金奇異果切粒粒~ 之後就用手動攪拌器打成金奇異果溶~ 可以倒入雪條棒棒啦~ 原來五個金奇異果都只係做到三條雪條，不過都夠我地三口子食啦~ 放入冰格雪大約四個鐘頭左右，我地嘅金奇異果雪條可以食得啦！ 由於雪到好冰硬，所以建議係甩雪條模時先用室溫水浸一分鐘，咁就可以好完整甩出嚟啦~ 為食小小豬食得好滋味呢~ 其實我覺得依個自家制雪條真係唔錯，只係用天然生果，而且方法簡單，所以依個夏天我都打算用多啲唔同種類嘅生果整雪條俾小小豬食，咁就可以食得健康啲嘛！ MY FACEBOOK~ MY WEIBO~ MY E-MAIL~ 其他博客區 ※※ SINA ※※ ※※ MyBB星級Blogger ※※ ※※ She.com ※※ ※※ WeShare ※※ ※※ U-Blog ※※ ※※ SeeWide ※※ ※※ BlogSpot ※※ ※※ BK Milk 親子語 ※※ ※※ Cook 1 Cook 星級廚師 ※※
