經過尖沙咀比較靜既棉登徑, 見到呢間"嵐山日本料理", 門外張貼左好多刺身壽司既宣傳Banner, 吸引左我入去一試! 店內設有吧檯同埋另一面普通既大檯, 雖然面積唔大, 但坐落亦沒有太迫既感覺。等埋妹妹放工黎, 就正式開餐! 店員先送上師傅精心製作既前菜, 最右邊既腐皮酸味味, 中間既蘿蔔片入口帶點甜, 咬後慢慢散發左少少wasabi味出來, 有少少辣。至於最左面既青瓜片+魷魚片, 同樣都是酸的, 很醒胃~ 我地先點左幾款是日推介既刺身, 刺身以冰墊底地上檯, 單看賣相已經見到刺身很肥美!!! 【赤貝刺身】HK$68 赤貝都幾大隻, 入口很爽 【中拖羅刺身】HK$148 厚厚既拖羅刺身超級肥美, 入口一咬, 魚油四溢...真令人一試愛上!! 【北海道牡丹蝦刺身】HK$148 蝦身同樣是飽滿肥美, 入口先帶少少甘, 鮮甜爽口 【帆立貝刺身】HK$40 帆立貝很大隻, 同樣只可以用鮮甜形容 之後, 我地就揀左三款壽司試試 【銀雪魚壽司】HK$58 【太刀魚壽司】HK$53 【左口魚壽司】HK$25 三款壽司中, 最獨愛都是"銀雪魚壽司", 表面略為燒過, 迫出魚油, 放入口後, 香口之餘, 豐富既魚油慢慢湧出, 正啊!! 【串燒日本青椒仔】HK$28 青椒仔燒後還keep到少少水份, 唔會太乾, 帶點辣~ 【燒明太子雞翼】HK$42@2隻 雞翼中釀入明太子, 令雞翼賣相脤卜卜。內裡帶些少肉汁, 不過表面juicy, 但就沒有脆口感。 【手打泡菜黑豚肉石頭鍋烏冬】HK$118 烏冬沒有彈牙口感, 呢款烏冬味道較淡, 事關整個烏冬中只有兩片泡菜, 就算唔食得辣既朋友都可以食。雖然用石頭碗上, 但送上檯已經沒有滾下滾下既熱。 整體黎講, 呢度既服務質素係非常之好, 不時為我地主動加茶同埋換碟。至於野食方面, 刺身最為出色, 熟食都是不過不失, 呢度既刺身真的令我很回味!!! ———————————————— 餐廳名稱：嵐山日本料理 Address: 尖沙咀棉登徑11號地舖 Tel.: 26222095 營業時間： 星期一至日 12:00-15:00 18:00-23:30 設加一服務費 接受預先訂座: Yes ====================
