今日去到朋友介紹既一間澳門隱世地道大排檔，我地由澳門新濠影匯出發，出發前睇過google只需搭8-10分鐘的士，又唔識搭其他交通工具，結果去到衣間隱世大排檔，相信巴士都去唔到，去到時早上10點半，一落車已經見全部爆滿，冇諗過咁多人，一落車全部目光望向我地！好明顯我地特登搭的士黎衣度捧場。 入到去唔會有人理你的，因為只有2個員工做野，一個煮野一個落單執野，睇見都忙到踢晒腳！ 好不容易我地等到位，今次我地一行四人，好好彩我地大約等左15分鐘左右，見有2人座就坐住先再等餘下的食客食完先坐低到。 建議如見等緊位期間差不多知道有位要落定單先，因為我地等緊途中其他食客都話等左半個鐘先有得食。衣度出名手打咖啡，食物款式都係d湯麵呀、多士、豬扒包辣魚包咁。結果嗌左杯凍同熱既手打咖啡&奶茶、豬扒公、餐蛋公、芝士腿蛋多同餐肉腿蛋多。 衣度既公仔麵係出前一丁來的，見佢用完一箱一箱出前一丁盒攞黎掉。終於有得食喇，應該等左20分鐘左右食物就慢慢先後來到，先係多士.....其實來到都係食佢既風味，你話係咪好好味又唔係，還可以啦！ 不過兩者的話餐肉腿蛋多會好味d，可能香口d啦。再黎飲品類.....衣度出名手打咖啡，凍熱都嗌左一杯，熱的朋友都讚，凍的還可以，聽到店員同其他食客講咖啡唔洗攪，唔知我地有冇誤會呢！ 咖啡表面到中間都有層厚厚杰杰既東西，應該就係佢既''手打''意思！ 不過鍾意咖啡既人對咖啡既要求都唔同，都未必個個岩口味，而奶茶凍同熱都麻麻，由其凍....有朋友形容平時奶茶通常奶多，衣度可能叫茶多，我係極度懷疑係咪漏左落奶或者要自行加奶，完全唔覺有奶味，同埋口味好水咁，不太喜歡。轉個頭望出門面已經有好多人黎等位，我諗只係相隔30分鐘左右。豬扒公同餐蛋公都可以啦！都係果句....食風味。 埋單$176，都抵食呀，得閒試下d新鮮野幾好呀！仲有走時本身諗住搭返的士走，但似乎都冇的士會入黎，結果問路下響門口左轉，前少少有條小巷，沿路一路上有好多級石樓梯，上到去有個巴士站，搭返去新濠影匯都係mop$6.3，不過最後都選擇左的士，衣度返去快好多平好多，回程$30，去程$53，差幾遠。
