唔係朋友介紹都唔知，原來旺角有間水準唔錯又抵食嘅日式放題~ 平時去親放題都係幫襯『大字頭』，價錢通常係二百幾蚊再加一，而呢間神輿只要7點前入座就只係$198加一就OK，星期五六日就貴$10。 睇門面及店內環境，神輿的確唔似其他放題店咁黑媽媽又逼夾，反之呢到仲光猛乾淨，用餐空間又闊落。 睇點菜紙上既食物我就覺得同大路既放題店不相伯仲啦，反正我都唔覺得係越多就等於好，食黎食去都係果D嫁姐，食物質素重要D吧。 點擊圖片放大 刺身總共叫左3轉，吞拿、北寄貝同帶子都唔錯 而三文魚、蝦刺身&馬刀貝就直情係掂！魚香、蝦甜、貝爽！ 希靈魚&象拔蚌就麻麻，有D腥。 平時去放題我都好少食海膽，因為10次有8次都係腥臭，但睇其他人食評話呢到D海膽OK，我都一於試下。係幾好喎，唔腥唔臭，仲有少少鮮甜，我都食左兩舊~ 不得不提呢到既炸物係新鮮熱辣的，但時間上就可能要等耐少少喇~ 呢件炸蠔外面脆卜卜，中間依然軟滑又有汁。 點擊圖片放大 +4 其他食物都無咩特別，又無咩出錯咁，屬於正常水平。 不過呢到甜品無咩選擇，得3款雪糕再加和菓子咁大把，同其他有木糠布甸 & 3.6奶凍既放題比起就有啲失色。 另外一提，呢到都有漏單既情況出現，但同侍應講聲佢地都會幫你追單，服務OK~ 下次可以再黎，非常好坐，食物中上，至於少少漏單都接受到，最緊要係抵食！ 神輿日本料理 地址：旺角彌敦道593-601號創興廣場5樓 (港鐵旺角站 E1 出口, 港鐵旺角東站 B 出口, 港鐵油麻地站 A1 出口) 營業時間：星期一至四 16:00-01:00 ；星期五至日及公眾假期前夕16:00-02:00 Openrice：https://www.openrice.com/zh/gourmet/reviews.htm?userid=63705209
