唔使出國，近在咫尺‧仲可以全程坐唔使行‧香港都有世界級郊遊好去處，地質公園海上生態遊 本文純粹遊記，並唔係試用分享文、並唔係賣廣告。純粹俾導賞員感動到， 希望幫助漁民、幫助宣傳連香港人都未必知道珍惜的歷史遺產。香港人成日話鍾意去外國旅行，但其實香港境內1個鐘已經去到的世界級景點又去過未? 香港地方雖然係彈丸之地，但你又去過幾多成? 香港人對香港地理歷史又識幾多? 點解唔可以留港旅行，境內消費帶動返自己地方經濟? 好多都值得反思一下。 旅行唔一定要出國，唔一定要貴。郊遊唔一定要行山，唔一定要曬太陽 西貢破火山地質漁民文化海上生態遊 ● 晴 ● 星期日 ● 農曆初十 和水 上個星期日，趁天氣好又秋高氣爽，我與BF兩人跟住GOtrip.hk 旅友團往地質公園玩。包括認識漁民文化、參觀西貢破火山地質遊等。我與BF一直都好想去見識下世界級的香港地質公園o架啦，終於可以去見證到香港幾千萬年前的歷史痕跡。全程主要係船上，全日行左唔多過800m路，o岩曬我呢d懶人~ 由"旅行家"團體帶領今次的海上生態遊，它們主張保育環保，持續性發展的體驗式生態旅遊培訓項目及活動，從而推動生態旅遊業的發展，令到人人關注、愛護生態環境。feel到佢地好有heart，好愛香港呢個地方。真係令團友學到野，並不似普通旅行團只係飲食玩樂 旅行家的Raymond係政府授權的香港國家地質公園導賞員(R2G)，要經過多次面試有實戰經驗，過到教授評審團關先可以授權，好專業ga。所有授權的導賞員名單可網上找到 http://www.hkr2g.net/b5_r2gh.cfm ~*~*~*~*~*~*~*~*~*~*~*~*~*~*~*~*~*~* 由西貢出發! 星期日早上我們於西貢碼頭旁的西貢海濱公園集合，係正巴士總站旁，好多巴士小巴都到。但我怕遲到就從將軍澳地鐵坐的士去，用左約20分鐘/$85。我們於西貢碼頭上船，正式開始一天的旅程...而我們的行程係下圖箭咀的反方向 漁業文化 - 船上導賞會 一上船作簡單介紹後便開始上午環節- 香港漁民文化生活。我們的導賞員和漁民代表糧船灣村長開始講解香港漁業文化歷史文化和發展、香港海洋生態系統。道出香港魚產量越來越少，香港下年尾全部海域禁止大型捕魚，讀書少的漁民生計受影響，唯有轉型攪遊客生意。所以希望本地人都支持下佢地 村長介紹漁業捕撈方式、操作種類與仍會批准的捉魚工具，例如：蟹籠、魚網、油鎚魚籠 跟住有緊張刺激的海上表現。我們和漁艇一路平排前進，一路看漁民怎樣真正人手划艇、怎樣用捉魚工具和拿回前一天收穫 糧船灣漁排 跟住漁艇一路走一路看表現，不知不覺便到達糧船灣漁排。糧船灣景區位於西貢東郊野公園，距離西貢市中心約20公里。到達漁排後，近岸觀察漁排養殖情況、養殖操作及生意運作。好大條魚!! 不過要養6年先有噤大~ 然後唔單止有餵飼示範，我們都可以在船上餵魚，魚糧係d平時漁民捉到的細魚 糧船灣天后廟 繼續開船到糧船灣陸上，我們入到糧船灣天后廟參觀，認識水上人的信仰。導賞講介紹認識漁民信仰節慶習俗、天后由來、和廟內物件: 廟外陶瓷裝飾、 天后行宮等。 村長示範擲聖筊、打更 糧船灣午膳 好快到左午飯時間，來到糧船灣海膽養殖場食特色風味餐。好多雜誌都介紹呢度有新鮮生海膽食。特色風味餐有８餸１湯，白飯任裝，仲有海膽紫菜春卷食~好豐富。 香港世界地質公園 食飽飯就開始下午環節- 地質公園遊。香港地質公園是具有特殊地質意義，融合自然景觀與人文景觀而構成的獨特自然區域。地質公園在今年九月被聯合國教科文組織列為世界級地質公園。我們坐船考察吊鐘洲及沙塘口山海蝕及六角柱狀地貌特色，導賞沿途講解六角柱火山石的形成過程及特色。>>按此<<可了解到六角形火山岩柱的形成同資料。 在 香港地質公園內，我們今次去看的是六方形火山岩柱景觀以西貢島嶼一帶最為壯觀。由於這些島嶼孤懸海上，若非乘船都睇唔到。布滿排列整齊高聳的六角形火山岩 柱，堪稱「天然六角形岩柱壁畫」。我們可以見到離火山口不同距離的六角柱火山石有不同形態。另外有d唔係壁而分開好似島嶼。 有無發現我們無上岸影相呢~ 香港地質公園鼓勵不登岸的海上遊覽，除了顧及安全外(之前有岩柱跌落撞人)，仲係因為可減少遊客對地質遺迹造成的壓力和破壞。為了生態保育，我們也要為自然環境提供更好的保護，在地質公園遊玩時千萬唔好破壞公物或帶走任何的岩石。 除左看到六方形岩柱外，沿途還可以欣賞到形態的海蝕地貌：海蝕洞、海蝕拱及海蝕隙等 登上橋咀看海積地貌- 海灘及連島沙洲等。d人連島沙洲上行好似在水上行緊~! 每當退潮時遊客可沿著連島沙洲步行前往橋頭，在漲潮時，連島沙洲會被海水浸沒，因此出發前要留意天文台的潮汐資料。另外在橋咀可以參觀火成岩: 流紋岩、凝灰岩和石英二長岩等 最後回到西貢碼頭完成一日精彩旅程 ~*~*~*~*~*~*~*~*~*~*~*~*~*~*~*~*~*~* 去地質公園玩的方法 -有經濟、有懶人之選: 我強烈建議先跟(b)導賞團大致上認識一下地理公園然後再(a)自行出往欣賞 (a) 週末興起想去，Walk-in之選 : 西貢海濱公園中的西貢地質文化資訊中心導賞團: 額滿即止 http://www.ecotoursaikung.com/index.php 西貢碼頭: $20來回街渡船票，15分鐘去地質公園中的橋咀海灘及連島沙洲。 自行遠足: 萬宜水庫等路線 http://www.geopark.gov.hk/b5_geopark2a.html 。自行去的人建議在西貢海濱公園中的西貢地質文化資訊中心借用導賞筆，在沿路了解更多資訊 (b) 預約想去、Join團之選 : 旅行家: 我跟的西貢破火山地質漁民文化海上生態遊 http://www.hklb.hk/tour27_CAT_b5.html 西貢海濱公園中的西貢地質文化資訊中心導賞團: 同上，$55起導賞團，可以打電話預約
