朝聖！走進宮崎駿動畫世界－三鷹の森ジブリ美術館 喺築地食飽飽，好友約咗喺東京讀書嘅中同見面，我同呢個中同唔熟，所以另行安排咗節目俾自己。由於好友幾年前嚟過一次東京，當時已經去咗三鷹の森ジブリ美術館，咁就啱喇！我可以自己去！因為由今年5月9日－7月15日美術館會暫停開放，休館施工，要到7月16先會再重開。咁就更加一定要參觀喇！ 我先由築地市場站坐9個站去新宿，再喺新宿轉車。 去到新宿再轉JR中央線去三鷹！大家要注意，記得要搭JR中央線（快速）去三鷹站，唔使30mins就到三鷹站！（嗰日已經因為天氣問題有慢駛同停駛情況） 好快嚟到三鷹站，要去三鷹の森ジブリ美術館就出三鷹站南口。 由三鷹站去三鷹の森ジブリ美術館有兩個方法：一係行路，二係搭車。 如果想搭車就喺三鷹站南口行落階梯B（上圖），然後過對面馬路。 呢度會有個龍貓車站站牌，喺度可以等一架上面會印住三鷹の森ジブリ美術館嘅巴士（下圖），搭呢架車就啱喇！搭乘料金:：片道(單程)：大人210yen、返復(來回)：320yen。（往返車票要喺9號乘車處前嘅售票機或巴士案內所購買，單程可以直接用Suica卡，唔使先買飛。上車後大概5mins就到。 如果大家想行過去都唔係太遠，大概行10-15mins就到。大家可以喺南口行落階梯C，一路直行就會到井之頭公園，再向右行就到達美術館。 我選擇從三鷹站行到三鷹の森ジブリ美術館，因為會途經一條好出名嘅道路，就係日本道路百選之一、四季都擁有美麗風景嘅：風の散步道（風之散步道）。 原本嗰日喺東京市區落住好大雨，但嚟到三鷹竟然冇落雨，涼涼哋嘅天氣加埋可以賞櫻，非常適合散步。 可惜行到井之頭恩賜公園就落起雨，果然我呢個雨神真係去到邊都落雨。 終於嚟到三鷹の森ジブリ美術館。三鷹の森ジブリ美術館係唯一以宮崎駿大師嘅動畫作主題嘅博物館，喺美術館內就好似置身於宮崎駿動畫中嘅世界。 一入園就見到龍貓同煤炭屎鬼售票亭啦！超級興奮！一嚟到就好有feel，成個人即刻變得好有童真。啱啱隔離有幾個台灣美眉，就請其中之一幫我影咗相。 繼續直行，就會見到換票處（帳篷嗰度）。 大家將將預先買好嘅入場兌換券攞出嚟交俾工作人員，然後先會換成真正嘅入場券。 入場券就係由3格宮崎駿動畫菲林膠片製成~每個人攞到嘅入場券都唔一樣㗎！值得好好珍藏！ 三鷹の森ジブリ美術館（三鷹之森吉卜力美術館），又稱吉卜力美術館。佢係一間位於日本東京都三鷹市嘅動畫美術館，正式名稱為三鷹市立動畫美術館（日語：三鷹市立アニメーション美術館）。該館由財團法人德間記念動畫文化財團（日語：財団法人徳間記念アニメーション文化財団）運營，收入由株式會社曼馬由特隊管理。 館主當然就係身兼作家、漫畫家、動畫導演嘅宮崎駿。首任館長係宮崎駿長子宮崎吾朗，2005年6月24日由中島清文接任第二任館長。 美術館外牆被綠色攀藤植物包圍，內裏粉飾得充滿童話色彩，宮崎駿更刻意將館內佈局設計成「就讓大家在這裡迷路」嘅感覺，俾參觀者自己發掘博物館嘅小樂趣。只要細心觀察，館內每一個小細節都會令你充滿驚喜。 常設展覽包括動畫嘅原理、原始嘅動畫片展示，重現製作工作室嘅場景，仲可以睇到歷年吉卜力作品嘅原稿等資料。 而館內最受歡迎係位於底層嘅「土星座」，會放映從未曝光嘅宮崎駿動畫短片。 大家如果係搭車離開美術館就係喺紅色巴士嗰個龍貓巴士站牌（上圖）等車番三鷹站。 美術館裏面係唔可以影相 （除咗頂樓嘅天空之城Laputa巨神兵）! 簡單D講，室內都唔可以影相 、室外就可以影! 美術館屋頂上矗立住一個1984年吉卜力推出嘅經典動畫《天空之城》裏面1:1嘅ロボット兵（巨神兵）。 喺巨神兵身後還有個小景點記得都要去，但要先穿過樹叢間嘅小徑，就會見到天空之城嘅中樞石碑。 石碑上刻住嘅就係Laputa文字。如果睇得明，咁就真係好勁！ 當然唔少得去位於B1嘅小小庭院，呢度係《魔女宅急便》嘅場景，好有童趣。有種去咗魔女琪琪屋企嘅後院咁！除咗汲水亭可以俾大家打水外，仲有堆放住木柴嘅迴廊。 另一邊樓梯下面嘅迴廊就係儲物櫃。 石拱門見到嘅圖畫就係《魔女宅急便》中「看得見海的城市」。（呢張彩繪圖畫應該係整個美術館中，大家唯一可以影到嘅圖畫。） 整個三鷹の森ジブリ美術館唔係好大，大概1.5hrs就可以遊覽完畢。如果大家想留喺度成日都得，因為無論手持幾點嘅入場券，只要進入美術館後就可以一直留到1800。 三鷹の森ジブリ美術館外圍好似一座迷你城堡～ 從細睇宮崎駿作品長大嘅我，童年記憶充滿咗宮崎駿大師動畫嘅畫面，今次嚟到三鷹の森ジブリ美術館絕對係一趟朝聖之旅。相信每一個嚟過三鷹の森ジブリ美術館嘅朋友都一定愛上呢度。 離開美術館，我向住井之頭恩賜公園進發，沿途上見到好靚嘅櫻吹雪景象。旁邊仲有停泊單車嘅地方。 遊完整個美術館，我終於明白大師點解會揀喺呢區設立三鷹の森ジブリ美術館。因為四周優美嘅環境同宮崎駿作品毫無一絲違和感覺，完全可以融合一齊，令所有遊人真真正正走進宮崎駿作品嘅世界之中。 提提大家，美術館將會喺2016年5月9日－2016年7月15日因施工休館，2016年7月16日先重新開放！ 三鷹の森ジブリ美術館 地址：東京都三鷹市下連雀1-1-83（都立井の頭恩賜公園西園内） 官網：http://www.ghibli-museum.jp/ 營業時間：10:00～18:00（每星期二休館）採預約制 開放入場時段： 第一場入場時間10:00（10:30為止） 第二場入場時間12:00（12:30為止） 第三場入場時間14:00（14:30為止） 第四場入場時間16:00（16:30為止） 門票價格： 成人、大學生：1,000日元 高中、國中生：700日元 小學生：400日元 4歲以上兒童：100日元 4歲以下兒童：免費
